Аб’яднанне імя Генадзя Карпенкі збіраецца прапагандаваць ягоныя ідэі

Сёння вядомаму беларускаму палітыку Генадзю Карпенку споўнілася б 58 гадоў. А напярэдадні Міністэрства юстыцыі перарэгістравала міжнароднае грамадскае аб’яднанне, якое носіць ягонае імя. Гэтую арганізацыю па-ранейшаму ўзначальвае ўдава палітыка – Людміла.

Выканкам аб’яднання цяпер узначальвае Валер Костка, які быў памочнікам Г. Карпенкі, калі той ўзначальваў гарвыканкам Маладзечна і з’яўляўся віцэ-спікерам Вярхоўнага Савету 13-га склікання. Сп. Костка распавёў, што адметнымі рысамі Г. Карпенкі былі маральнасць, павага да падначаленых, чуласць, апора на прафесіяналаў.

Валер Костка гаворыць, што аб’яднанне імя Г. Карпенкі будзе значна павялічваць сваю адукацыйную дзейнасць. І тлумачыць: “Усе змены, як вядома, пачынаюцца з мазгоў. Калі людзі зашораныя, калі яны жывуць у нейкіх стэрэатыпах, калі няма магчымасці параўноўваць, гэта прыводзіць да застою. Таму задача нашай арганізацыі не ўкліньвацца ў палітычную барацьбу, якая цяпер ідзе, а данесці да людзей як адну з альтэрнатываў таго тыпа кіраўніцтва, якім валодаў Г. Карпенка”.

Удава Г. Карпенкі з дзецьмі ўжо больш за пяць гадоў жыве ў Нямеччыне. “Усе гэтыя гады я старалася захаваць арганізацыю. І не таму, што яна названая імем Генадзя. А таму, каб працягнуць ягоныя справы, ідэі, планы, дзеля якіх ён аддаў сваё жыццё, – гаворыць яна – Увесь час мяне мучыла адно пытанне: а ці патрэбны цяпер народу Беларусі ідэі Карпенкі, ці памятаюць яго наагул? Я думаю, што памятаюць. І ў гэтым я пераканалася на сустрэчы ў Нямеччыне, калі да мяне падыходзілі людзі, што прыехалі з Беларусі. Гэта былі не толькі сталыя, дасведчаныя асобы, але і моладзь. Ды і артыкулы Генадзя актуальныя і сёння. Як быццам іх пісалі ня 8-9 гадоў таму, а ўчора”.

Г. Карпенка памёр 6 красавіка 1999 года – вядомы апазіцыйны палітык на той час быў намеснікам старшыні Аб’яднанай грамадзянскай партыі. Ён рыхтаваўся да прэзідэнцкіх выбараў. Сябры Г. Карпенкі лічаць ягоную смерць загадкавай.

Паводле Радыё “Свабода” (www.svaboda.org)