Мітынг індывідуальных прадпрымальнікаў

Учора ў беларускай сталіцы прайшоў мітынг індывідуальных прадпрымальнікаў. Каля тысячы асобаў сабралася на плошчы Бангалор на санкцыянаваную акцыю, каб выразіць свой пратэст супраць указа № 760, які адбірае ў дробных бізнесоўцаў магчымасць прымаць на працу наёмных працаўнікоў, акрамя чальцоў сям’і. Да згаданага дакумента дадаўся наступны ўказ – № 302, паводле якога прадпрымальнікі мусяць перайсці ва ўнітарныя прадпрыемствы і рэгістравацца па месцы жыхарства.

Такім чынам чыноўнікі змагаюцца з канкурэнцыяй у галіне, якая прыносіць ім велічэзныя даходы, – мяркуе Анатоль Шумчанка, старшыня грамадскага аб’яднання “Перспектыва”, якое зладзіла мітынг.

А. Шумчанка распавёў: “Мы спадзяваліся, што нас пачуюць, а ці гэта так – пакажа час. Мы змагаемся за тое, каб у Беларусі ўлады прытрымліваліся цывілізаваных нормаў. Гэта значыць, каб прадпрымальнікі маглі наймаць на працу кожнага грамадзяніна, а не толькі сваіх блізкіх сваякоў. Гэта права ў іх адабраў указ № 760. А дзяржава не стварае адпаведных умоваў для бізнесоўцаў, каб яны маглі без шкоды для сваёй дзейнасці стаць юрыдычнай асобай. Мы можам апынуцца ў сітуацыі, падобнай да рэчаіснасці Савецкага Саюзу, калі ўсе хадзілі ў аднолькава непрыгожай, шэрай вопратцы, і стараліся купіць нешта моднае, імпартаванае з-пад прылаўка.

Аргументы ўладаў у тым, што мы павінны ісці ў нагу з часам, прадаўцы павінны быць юрыдычнымі асобамі, гэта толькі заслона, за якой хаваецца жаданне чыноўнікаў пашкодзіць сваім канкурэнтам. Бо прадпрымальнікі – канкурэнты чыноўнікаў, забіраюць ім поле дзейнасці, на якім яны зарабляюць велічэзныя грошы. Ідзе змаганне, падчас якога кожны стараецца пралабіраваць той закон, які дазволіць яму больш зарабляць, лепш кіраваць прадпрыемствам, быць менш адказным, і гэтак далей”.

Арцём Шаркоў з Мінскага сталічнага саюзу прадпрымальнікаў звяртае ўвагу на іншы дакумент – указ № 302, які крыху аблягчае лёс прадпрымальнікаў. Але, тым не менш, зазначае Шаркоў, у выніку дадзеных дакументаў вялікая частка бізнесоўцаў не ўтрымаецца на рынку.

А.Шаркоў кажа: “Гэты ўказ рэгламентуе больш плаўны і просты пераход прадпрымальнікаў. Устаўны фонд фармуецца інакш, больш простая сістэма пераходу. Ім не трэба плаціць грошы за рэгістрацыю. Сусветная практыка паказвае, што паўсюдна існуюць прадпрымальнікі ў форме юрыдычных асоб. У нас 10 гадоў таму, калі было высокае беспрацоўе, далі магчымасць людзям займацца індывідуальнай працоўнай дзейнасцю.

Трэба, каб была нейкая празрыстасць. Зараз ідзе працэс адбору – выжывуць больш моцныя прадпрымальнікі. Гэта, канешне, негатыўны крок для тых, хто прывык працаваць сам для сябе. Гэта робіцца дзеля таго, каб прадпрымальнікі паказвалі, дзе яны бяруць тавар, за які кошт купляюць яго, за які кошт прадаюць. Цяпер прадпрымальнікі ездзяць у Расію, Украіну, закупляюць там тавар і тут прадаюць без якіх-небудзь дакументаў. Патрэбны ўлік, і таму зроблены гэты ўказ”.

Улік, можа, і патрэбны, але беларуская дзяржава так моцна прыціскае прадпрымальнікаў фармальнымі патрабаваннямі і праверкамі, што многія з іх стараюцца уцячы ў шэрую зону. Дарэчы, адным з метадаў барацьбы з бізнесоўцамі стала канфіскацыя тавару.

У выніку новых правілаў прайграюць усе спажыўцы – кажа незалежны эканаміст Іван Мікітчанка: “Кантролю больш, чым трэба. У нас усіх гэтых кантралёраў можна саджаць у турму. Карупцыя ўсюды. Я нядаўна быў на рынку ў Ждановічах. Там столькі зачынена ўжо кіёскаў, што калі ўвойдуць новыя законы, і зусім рынак закрыецца. Ад гэтага мы прайграем, пакупнікі. Зноў з’явіцца манапаліст – дзяржава. Кажуць – купляйце ўсё беларускае. Я вось купіў малому веласіпед лідскай вытворчасці, месяц не паездзіў – і ўсё, выкідвай. Так што гэта будзе ўдар па спажыўцу”.

Паводле “Польскага радыё для замежжа” (http://www.polskieradio.pl/zagranica/by/)