У Глушы на Магілёўшчыне з’явіцца музей Алеся Адамовіча

3 верасня пісьменніку споўнілася б 80 гадоў, аднак беларускія ўлады фактычна ніяк не адзначылі гэтую дату. Стварэнне музея стала магчымым выключна дзякуючы высілкам дачкі пісьменніка Наталлі Адамовіч-Шувагінай.

Яна дамаглася ад Бабруйскага райвыканкама рашэння аб перадачы будынка старой аптэкі ў раённую камунальную ўласнасць. Менавіта тут і паўстане музей. Да вайны загадчыцай гэтай аптэкі была маці Алеся Адамовіча. Пазней пісьменнік згадаў гэты факт у творы “Вайна пад дахамі”, а жыхары Глушы сталі прататыпамі галоўных герояў аповесці.

Прапанова па стварэнні музея Алеся Адамовіча ў Глушы ўжо ўхваленая і ўпраўленнем культуры Магілёўскага аблвыканкама. У гэтым годзе плануецца знайсці крыніцы фінансавання на рамонт і добраўпарадкавання будынка. Адкрыецца музей, як мяркуецца, у наступным годзе.

Паводле Радыё “Рацыя” (www.racyja.com)