Рэжысёр Мікалай Пінігін паставіць “Пінскую шляхту” Дуніна-Марцінкевіча

У траўні наступнага года на сцэне тэатра імя Янкі Купалы павінна адбыцца прэм’ера спектакля паводле п’есы Вінцэнта Дуніна-Марцінкевіча “Пінская шляхта”. Пра гэта паведаміў рэжысёр Мікалай Пінігін.

Паводле яго слоў, спектакль будзе прысвечаны 200-годдзю з дня нараджэння пісьменніка. Дарэчы, з гэтай нагоды ЮНЭСКА абвясціла 2008-ы годам Дуніна-Марцінкевіча.

Як распавёў рэжысёр, рэпетыцыі пачнуцца ў сакавіку, а ўжо напрыканцы траўня адбудзецца прэм’ера. Разам з тым, М. Пінігін не стаў раскрываць сакрэты будучага спектакля.

М. Пінігін распавёў: “Пра той спектакль, які яшчэ не выйшаў, я не магу гаварыць. Яшчэ вельмі далёка да таго моманту, калі пачнуцца рэпетыцыі. Я нічога не ведаю яшчэ… А пра тое, што не выйшла… Пакуль дзіця не народжана, ніхто не гаворыць, якім яно будзе...”

Паводле “Еўрапейскага радыё для Беларусі” (www.belradio.fm)