У Байнэце з’явіўся Лунэт

30 жніўня ў беларускім сегменце Інтэрнэту стартавала акцыя “Падаруй Лукашэнку яго Лунэт!”, якая закліканая прадэманстраваць абсурднасць і небяспечнасць патрабаванняў Аляксандра Лукашэнкі зрабіць кантроль за Інтэрнэтам у Беларусі больш жорсткім. У гэты дзень каля 40 сайтаў, што падтрымалі гэтую акцыю, размясцілі ў сябе банеры, якія вядуць наведвальнікаў у Лунэт – правобраз Інтэрнэту ў разуменні А. Лукашэнкі. У прыватнасці, на яго пошукавы сэрвіс Лундэкс, відэа-сэрвіс ЛуТуб, блогі Лу-часопіс.

“Праблема кантролю Інтэрнэту датычыць некалькіх мільёнаў беларусаў. Таму мы лічым важным і своечасовым узняць гэтую тэму на беларускай і замежнай медыяпрасторах, звярнуць на яе ўвагу палітыкаў, СМІ і грамадзянскай супольнасці. Нельга дапусціць, каб апошняя апора свабоды ў Беларусі знікла. Настаў час паказаць, што нават ва ўмовах віртуальнага свету мы можам прадэманстраваць рэальную салідарнасць. Мы не павінны дапусціць пераўтварэння Беларусі ў варожы Інтэрнэту Кітай!” – заявіў адзін з ініцыятараў акцыі, каардынатар інтэрнэт-супольнасці “Трэці Шлях” Павал Марозаў.

Пагроза свабоды Байнэту ўзнікла не сёння, але абвастрылася на пачатку жніўня 2007 г. Тады, пры наведанні рэдакцыі газеты “Советская Белоруссия” Аляксандр Лукашэнка заявіў: “Безуладдзе ў інтэрнэце трэба спыняць”. Беларускае тэлебачанне  падхапіла эстафету і паказала прапагандысцкі рэпартаж, дыскрэдытуючы свабодны Інтэрнэт і фільм “Сеткавыя войны”. Беларускі парламент гатовы восенню прыняць патэнцыйна рэпрэсіўнае заканадаўства па кантролю над СМІ і Інтэрнэтам. З 2005 г. ідзе пераслед аўтараў флэш-анімацыі “Мультклуб”, размешчанай у Інтэрнэце.

Кантакты арганізатараў акцыі:
Сайт акцыі: www.fromlu.net
Эл. пошта:  belmov@gmail.com
Скайп: zmicer_traecki

Паводле www.belmov.org