Месячнік беларускай культуры ў Латвіі

Ліпень для беларусаў – месяц асаблівы. Менавіта ў гэтым месяцы, менавіта на Купалле – любімае беларусамі свята, нарадзіўся пясняр нашага народа Іван Дамінікавіч Луцэвіч, які пазней стаў вядомы як Янка Купала. І нам беларусам асабліва прыемна, што менавіта ў ліпені ў адным з раёнаў нашай  Ліепаі, у ваенным гарадку, праходзіў месячнік беларускай культуры.

Арганізатар мерапрыемства – культурна-інфармацыйны цэнтр “К@2”, які распрацаваў і ажыццяўляе праект пад назвай “Нашы расказы – СМІ і адкрытая прастора”.

“Нашы расповеды – не пра “зорак”, але людзей здольных і таленавітых, якія жывуць побач з намі, – расказала Крысцінэ Брыедэ, намеснік старшыні праўлення “К@2”. – Такім самабытным калектывам з’яўляецца ансамбль беларускай песні “Паўлінка” суполкі “Мара”. Нам захацелася па-новаму адкрыць яго для ліепайчан. А дакладней – даць яму магчымасць расказаць пра традыцыі беларускага народа на адкрытай прасторы. Тым больш, што ёсць падстава – сёлета беларусы святкуюць 125-годдзе з дня нараджэння сваіх песняроў Янкі Купалы і Якуба Коласа. А цудоўнае народнае свята Купалле адзначаюць на прыродзе”.

“Паўлінка”  і распавядала пра Купалле – родным словам і песняй. І быў гэты расповед ля вогнішча, дзе дзяўчаты са сваім кіраўніком Жаннай Буйніцкай, спявалі купальскія песні, праводзілі гульні, расказвалі пра купальскія прыкметы на Беларусі. Актыўнымі ўдзельнікамі свята сталі гледачы. Яны з задавальненнем удзельнічалі ў гульнях і падпявалі дзяўчатам па-беларуску. А потым яшчэ доўга не хацелі адпускаць калектыў, які адкрыў ім цікавую старонку народнай мудрасці.

Вельмі прыемна, што актыўнымі ўдзельнікамі месячніка беларускай культуры сталі дзеці. Яны знаёміліся і з купальскімі традыцыямі. А пасля, праз некалькі дзён, з захапленнем слухалі ля вогнішча беларускія народныя казкі, якія чытала для іх каардынатар праекта сацыяльны педагог Люба Казімава.

Паводле www.svitanak.lv