Паўлу Севярынцу прысудзілі 15 сутак

22 жніўня суддзя Маскоўскага раёну Брэста Вольга Смірнова вынесла прысуд Паўлу Севярынцу. Палітык пакараны на 15 сутак арышту паводле артыкулу 23.34 Адміністрацыйнага кодэксу — “паўторнае парушэнне Закону аб сходах і масавых мерапрыемствах”.

Перад абвяшчэннем перапынку ў судзе П. Севярынец атрымаў слова: “Тое, што адбылося 19 жніўня і ў наступныя дні – беззаконне. Як і шмат з таго, што творыцца цяпер у Беларусі. За гэтае беззаконне давядзецца адказваць перад судом чалавечым і судом Божым. “Якім судом судзіце, такім і вас судзіць будуць”, — нагадаў я суду Евангелле паводле Мацвея”.

Пасля перапынку ў судзе сведчыў удзельнік сходу Віталь Кісель. Ён заявіў, што П . Севярынец не быў арганізатарам сустрэчы ў Брэсце. Адвакат Павал Алесін прапанаваў спыніць справу супраць П. Севярынца. Рашэнне суду зачытала суддзя В. Смірнова — 15 сутак.

Нагадаем, што П. Севярынца арыштавалі ў Брэсце 19 жніўня падчас прэзентацыі ягонай кнігі “Лісты з лесу”. Разам з ім было затрымана 28 чалавек. Раней П. Севярынец быў асуджаны на 15 сутак адміністрацыйнага арышту пасля затрымання напярэдадні святкавання гадавіны абвяшчэння дзяржаўнага суверэнітэту 27 ліпеня.

Ад часу вяртання П. Севярынца з вёскі Малое Сітна на Віцебшчыне, дзе палітык адбываў амаль два гады абмежавання волі, мінула 90 дзён. З “хіміі” сп. Севярынца вызвалілі сёлета ў траўні на чатыры месяцы раней, чым меў скончыцца тэрмін пакарання.

Паводле Радыё “Свабода” ( www . svaboda . org )