У Зэльве моладзь ушанавала памяць Ларысы Геніюш

Некалькі дзесяткаў маладых людзей ушанавалі ў Зэльве памяць Ларысы Геніюш, знакамітай беларускай паэткі і дзеяча нацыянальнага руху. Гэтымі днямі ёй споўнілася б 97 гадоў.

А 9-й гадзіне ў суботу ў мясцовай Свята-Траецкай царкве прайшло набажэнства, на якім прысутнічала моладзь з Зэльвы, Гродна, Слоніма, Свіслачы. Пасля каля помніка Ларысе Геніюш недалёка ад праваслаўнага храма былі ўскладзены кветкі, запаленыя знічкі.

Пазней усе сабраліся каля магілаў Ларысы і Янкі Геніюшаў, чыталі вершы, гучалі прамовы. Агулам прысутнічалі каля 50 чалавек.

Пра значэнне асобы Ларысы Геніюш распавёў адзін з удзельнікаў зэльвенскага ўшанавання, журналіст і грамадскі дзеяч Павел Мажэйка:“Сёння ў нас не хапае ў палітыкаў, у эліты той мужнасці, сілы волі, адвагі, духоўнасці, якія мела Геніюш… Ларыса Геніюш – гэта тая асоба, якая праз сваё жыццё, праз сваю творчасць пранесла сілу духа”.

Акцыя праходзіла пад нацыянальнай сімволікай.

Паводле “Еўрапейскага радыё для Беларусі” (www.belradio.fm)