Сёння – дзень беларускага кнігадруку

490 гадоў таму, 6 жніўня 1517 г., Францыск Скарына выдрукаваў у Празе сваю першую кнігу. Гэта быў “Псалтыр”. Потым ён выдаў яшчэ 19 кніг (або 22, калі лічыць “Царствы” за 4 кнігі).

Потым Скарына пераехаў у Вільню, дзе выдаў Малую падарожную кнігу і Апостала.

Нагадаем, што першую кнігу ў Еўропе з дапамогай наборнага шрыфту выдаў у сярэдзіне 15 ст. Гутэнберг (у 868 г. у Кітаі вынайшлі спосаб друкавання кніг з дапамогай ксілаграфіі, г.зн. з дапамогай гравіраванай на дрэве формы).

Першая славянская кніга (па-чэшску) выйшла ў 1468 г. Гэта была “Траянская хроніка”. Першыя кнігі кірыліцай выдаў у Кракаве ў 1491 г. Швайполь Фіёль.

Літоўцы прачнуліся ў 1547 г., маскоўцы (Іван Фёдараў) – ў 1564 г., украінцы – у 1574 г., праўда, рукамі таго ж Фёдарава.

На тэрыторыі сучаснай Беларусі першая кніга на беларускай мове выйшла ў 1562 г. Гэта быў “Катэхізіс” Сымона Буднага.

Паводле “Нашай Нівы” (www.nn.by)