Палякі і беларусы паплывуць разам па Бугу

Мяжа не з’яўляецца перашкодаю ў кантактах паміж людзьмі. Аб гэтым будзе сведчыць сумесная польска-беларуская вандроўка на байдарках па польскай частцы ракі Буг. У жніўні па рацэ Буг будуць разам плыць палякі і беларусы. Гэты адпачынак, наладжаны ў рамках праграмы “Суседства: Польшча – Беларусь – Украіна”.

Польска-беларускае падарожжа на байдарках адбудзецца 12-14 жніўня. Яно пачнецца ў мясцовасці Няміраў, якая знаходзіцца на польска-беларускай мяжы, пройдзе праз Мельнік і закончыцца ў польскім Драгічыне.

Анна Берэза з польскай мясцовасці Семятычэ, якая арганізоўвае сёлетняе падарожжа, выказвае надзею, што мерапрыемства будзе цікавым і споўніць вызначаныя мэты: “Зацікаўленне падарожжам на байдарках вельмі вялікае. У дадзены момант ужо няма свабодных месцаў. Сёлета будуць удзельнічаць 40 чалавек з Польшчы, а з Беларусі прыедзе 20 чалавек.

Кожны год адбываецца байдарачнае падарожжа па Бугу на адрэзку Мельнік – Драгічын і амаль да самай Варшавы. Гэта вандроўка працягваецца 6 дзён і ладзіцца ў рамках праграмы прамоўцыі рэгіёну і актыўных формаў адпачынку. Але ў рамках праграмы “Суседства з Беларуссю” такое байдарачнае падарожжа арганізоўваецца ўпершыню. Мы першы раз запрасілі беларускі бок, каб паказаць, што мы можам разам захапляцца гэтай тэрыторыяй і імкнуцца да развіцця рэгіёну ўздоўж Буга. Паколькі гэта транспамежная рака. І ня толькі Польшчы і Беларусі, але і Украіны.

Ідэя імпрэзы ўзнікла ў Беларусі. Сама ідэя мае цудоўную мэту: мы хочам паказаць, што мяжа не з’яўляецца перашкодаю ў кантактах паміж людзьмі і ў развіцці тэрыторыяў. Удзельнікамі падарожжа будуць таксама прадстаўнікі мясцовага кіравання з абодвух бакоў. Запрошаныя розныя турыстычныя бюро, каб у будучыні яны зацікавілі гэтымі землямі турыстаў”.

Паводле “Польскага радыё для замежжа”

(www.polskieradio.pl/zagranica/by)