Беларус атрымаў ганаровы прыз за працу для дзяцей

Мастацкі кіраўнік віцебскага тэатра “Лялька” Віктар Клімчук атрымаў на 14-м Фестывалі дзіцячых тэатраў у сербскім горадзе Субоціца ганаровую ўзнагароду — статуэтку “Маленькі прынц”.

В. Клімчука адзначылі гэтым прызам за шматгадовую выдатную працу па развіцці культуры і тэатральнага мастацтва для дзяцей, а таксама за вялікі асабісты ўклад у развіццё культурных сувязей паміж краінамі.

Гэта статуэтка вагай у сем кілаграмаў аўтарства вядомага сербскага скульптара Міё Міюсківіча ўручаецца штогод самым знаным тэатральным дзеячам. Уладальнікамі ганаровага прызу з’яўляюцца Альбэрт Розэр (Германія), Генрык Юркоўскі (Польшча), Ёзэф Крофта (Чэхія), Маргарыта Нікалеску (Францыя) і Янаш Мецнэр (Венгрыя).

Віцебскі тэатр “Лялька” пад кіраўніцтвам В. Клімчука яшчэ ў 1999 годзе, падчас першага ўдзелу ў конкурсе фестывалю, атрымаў Гран-пры за спектакль паводле Яна Баршчэўскага “Загубленая душа, альбо Пакаранне грэшніка”. Праз год узнагароду “За высокія мастацкія дасягненні” атрымала лялечная пастаноўка “Чароўная зброя Кэндзо”.

Віктар Клімчук – сталы сябра журы і адказвае за селекцыю еўрапейскіх калектываў, вартых удзелу ў фестывалі ў Субоціцы.

Паводле Радыё “Рацыя” ( www . racyja . com )