Украінская недзяржаўная арганізацыя запрашае ў валанцёрскі летнік

Украінская недзяржаўная арганізацыя “Інстытут грамадскага лідэрства” запрашае валанцёраў у міжнародны летнік “Пад Каменем”. Моладзі прапануецца дапамагчы ў аднаўленча-рэстаўрацыйных працах у кляштарным комплексе ў мястэчку Падкамень, што ў Бродзінскім раёне на Львоўшчыне. Удзельнікі летніку змогуць таксама наведаць навакольныя замкі, азнаёміцца з традыцыямі украінскай грэка-каталіцкай царквы і цікава правесці час у сяброўскім асяродку.

Мястэчка Падкамень вядомае па гістарычных дакументах з 1441 г., сваю назву атрымала ад вялізарнага каменю на вяршыні ўзгорку. Ад гэтага ж помніку прыроды паходзіць і назоў летніку. У XV ст. дамініканцамі ў мястэчку быў заснаваны кляштар.

Для ўдзелу трэба:

* мець жаданне і здольнасць працаваць;

* быць далучаным да маладзёвага руху альбо цікавіцца ім;

* 50 грыўнаў на арганізацыйны ўнёсак.

Мэта летніку – аб’яднаць актыўную моладзь вакол супольнай ідэі дапамогі ў аднаўленчых працах у кляштарным комплексе ў Падкамені і стварыць сяброўскі асяродак, які паспрыяе супрацоўніцтву ў будучыні.

Працоўнымі мовамі будучага летніку яго арганізатары лічаць “любыя, якія прывядуць да ўзаемаразумення”.

Па адрасе http://svetlahorsk.belarda.org/info/abviestki маецца падрабязная інфармацыя па-беларуску. Анкеты для конкурснага адбору арганізатары просяць дасылаць да 1 ліпеня.

Паводле www.belngo.info