Сустрэча з ветэранамі ў Томску

Адна з добрых традыцыяў, якую стварыла Аўтаномія беларусаў Томска, — гэта сустрэчы з ветэранамі Вялікай Айчынная вайны.

У гэтым годзе перад святкаваннем Дня незалежнасці Рэспублікі Беларусь* Аўтаномія правядзе яшчэ адну сустрэчу з ветэранамі вайны, беларусамі па нацыянальнасці, і тымі, хто ваяваў на тэрыторыі Беларусі. Сярод запрошаных – Леанід Аляб’еў, Веніамін Волкаў, Іван Кандаўраў і іншыя ветэраны.

“Нам заўсёды прыемна зрабіць нешта добрае для ветэранаў вайны, — кажа старшыня Аўтаноміі беларусаў Томска Любоў Адаскевіч. – Мы сапраўды жадаем дастаўляць ім радасць, знаёміць з імі маладых людзей, каб тыя паважалі абаронцаў бацькаўшчыны, разумелі кошт перамогі, кошт чалавечага жыцця. На сустрэчы мы распавядзем пра кожнага з запрошаных, падрыхтуем літаратурна-мастацкую кампазіцыю, якая прысвечаная Вялікай Айчыннай вайне, а таксама праграму з музыкальнымі віншаваннямі для нашых гасцей. Сустрэча пройдзе ў маленькай кавярні, я ўпэўненая, што вечарына атрымаецца вельмі шчырай і цёплай”.

Аўтаномія беларусаў Томску

* Ад рэдакцыі. Дзень незалежнасці Рэспублікі Беларусі да 1996 года святкаваўся 27 ліпеня ў Дзень абвяшчэння Дэкларацыі аб незалежнасці Рэспублікі Беларусь. У выніку рэферэндуму 24 лістапада 1996 года Дзень незалежнасці Беларусі быў перанесены на 3 ліпеня – дзень вызвалення Мінска ад нямецкіх захопнікаў. У выніку шматлікіх парушэнняў і фальсіфікацый, якія мелі месца падчас правядзення згаданага рэферэндуму, дэмакратычны свет і беларуская апазіцыя лічаць яго нелегітымным.