“Газпрам” заплаціў першыя грошы за “Белтрансгаз”

“Газпрам” выплаціў Беларусі 625 млн. долараў, выкупіўшы такім чынам у ААТ “Белтрансгаз” 12,5% акцый. Пра гэта паведамілі афіцыйныя крыніцы.

Нагадаем, падпісанне дагавора куплі-продажу акцый “Белтрансгазу” адбылося 18 траўня. У гэты ж дзень дагавор быў зарэгістраваны ў Дзяржаўным камітэце па маёмасці Рэспублікі Беларусь. Згодна з дагаворам, Расія павінна была выплаціць згаданую суму на працягу найбліжэйшых 20 працоўных дзён. Грошы “Газпрам” пералічыў датэрмінова.

Цяпер, паводле ўмовы дагавора, у 10-дзённы тэрмін беларускі бок перавядзе 12,5% акцый “Газпраму”. Далей на працягу 50 дзён неабходна будзе правесці сход акцыянераў, на якім у склад членаў савета сумеснага прадпрыемства будзе ўведзены прадстаўнік “Газпрома”.

Як паведамлялася раней, спачатку беларускі бок меў на мэце атрымаць грошы за 50% акцый ААТ “Белтрансгаз”, але паводле жадання “Газпрама” выплата будзе адбывацца паэтапна на працягу найбліжэйшых трох гадоў.

Кошт “Белтрансгазу” ацэнены ў 5 млрд. долараў ЗША. Штогод “Газпрам” будзе набываць 12,5% акцый кампаніі. Сродкі ад продажу часткі беларускай газатранспартнай сістэмы пойдуць у бюджэт Беларусі. Расійскі бок уступіць у правы ўласнасці і карпаратыўнага кіравання 1 сакавіка 2010 года, пасля таго як поўнасцю выкупіць 50% акцый “Белтрансгазу”.

Паводле БелаПАН і газеты “Наша Ніва”