VIP-персонаў на кангрэсе практычна не будзе

Палітычная рада аб’яднаных дэмакратычных сілаў прыбрала са спісу патэнцыйных дэлегату Кангрэсу дэмакратычных сілаў практычна ўсіх VIP -асобаў, значных людзей для Беларусі, якія праходзілі на мінулы кангрэс без збору подпісаў.

Разам у спісе патэнцыйных дэлегатаў з ліку VIP-персонаў было 273 прозвішчы. З іх 28 палітычных вязняў, 55 дэпутатаў Вярхоўнага Савету 13-га склікання, якія ў 1996 годзе паставілі подпісы за імпічмент Аляксандру Лукашэнку, і 190 іншых вядомых асобаў.

Выявіліся дзве пазіцыі: так, кіраўнік Аб’яднанай грамадзянскай партыі Анатоль Лябедзька лічыць, што ў спіс павінны ўвайсці толькі сапраўды вядомыя ўсёй Беларусі асобы (прыкладам, Ніл Гілевіч, Васіль Старавойтаў ці Радзім Гарэцкі). А спіс больш чым на дзвесце асобаў, на ягоную думку, толькі дыскрэдытуе саму ідэю:

“Пры ўсёй павазе да людзей, якія ўваходзяць у агульны спіс, ён нагадвае спіс з некалькіх спісаў. Ёсць спіс, у які ўваходзяць, так бы мовіць, добрыя людзі, добрыя прафесіяналы — лекар, настаўнік і г.д. Але калі мы гаворым пра VIP-персонаў нацыянальнага ўзроўню, дык гэта павінна быць сапраўды асоба. І калі мы называем пэўнае прозвішча, дык павінна быць поўнае ўяўленне, хто гэта такі.

А вось агучваюць спіс, які пададзены Беларускай радай інтэлігенцыі. І на палове прозвішчаў дзве траціны сяброў Рады паціскаюць плячыма. Ну, як параўнаць Ніла Гілевіча ці Генадзя Бураўкіна з нейкім добрым чалавекам з нейкага рэгіёну?!”

У старшыні Палітычнай рады Аляксандра Мілінкевіча іншая думка. Калі не разбавіць дэлегатаў кангрэсу вядомымі людзьмі, дык ён ператворыцца ў Кангрэс выключна партыйных сілаў:

“На папярэднім кангрэсе больш за палову людзей у залі былі непартыйныя: журналісты, пісьменнікі, актывісты грамадскіх арганізацыяў. І гэта надавала яму права называцца Кангрэсам дэмакратычных сілаў.

А сёння кангрэс ператвараецца ў Кангрэс партыйных сілаў. Я вельмі паважаю партыйных актывістаў, але ж гэта толькі маленькая частка дэмсілаў. І калі не далучаюць да форуму піс ь меннікаў, прысутнасць якіх у залі — гэта ж гонар для самога кангрэсу, пра што тады казаць? Сумна гэта, нават вельмі сорамна.

Гэта яшчэ адно сведчанне, што атрымліваецца такая кулуарная тусоўка. У гета самі сябе запіхваем”.

Усе спрэчкі спыніла сакратар ЦК Партыі камуністаў Беларускай Алена Скрыган. Яна паведаміла, што кіраўніцтва яе партыі сёння вырашыла: статус дэлегатаў кангрэсу з VIP-персонаў могуць мець толькі палітвязні. Усе астатнія значныя людзі — толькі госці. За гэта ёй і даручана галасаваць. З прапановай камуністаў пагадзіліся ўсе астатнія сябры Палітрады.

Такім чынам, да 863 дэлегатаў кангрэсу, якія абраныя на сённяшні дзень, далучацца яшчэ і палітвязні. Сярод іх, у прыватнасці, Міхаіл Марыніч, Вячаслаў Сіўчык, Аляксей Шыдлоўскі, Васіль Лявонаў ды іншыя.

Паводле Радыё “Свабода” ( www . svaboda . org )