Новы альбом N.R.M. “ 06” з’явіцца ў крамах праз тыдзень

Да выхаду альбома N.R.M. над назвай “ 06” застаўся тыдзень. Лявон Вольскі распавёў пра тое, што чакае меламанаў у скрыначцы з новым кампакт-дыскам.

Лявон Вольскі: “Альбом называецца “ 06”. На вокладцы канструкцыя з чэрапа, лічбаў 0 і 6 і ўсякай дзіўнаватай сімволікі. Песень 14. Абсалютна рознастылёвыя песні, нават без драйва ёсць. У двух песнях выкарыстаная духавая секцыя, і яшчэ ў “Менск і Мінск” – віяланчэль”.

Альбом “ 06” суправаджаецца буклетам на 6 старонак, у якім, апроч тэкстаў песень, змешчаны выявы ордэнаў і медалёў Незалежнай Рэспублікі Мроя. Ёсць і іншыя сюрпрызы ў новага альбому.

Лявон Вольскі: “Нашыя энэрэмаўскія дзеткі праспявалі рэфрэн у песні, якую напісаў Алезіс. Дарэчы, Алезіс вызначыўся і напісаў для гэтага альбома ажно тры песні, прычым і тэксты, і музыку. Адна, напэўна, самая хітовая песня называецца “Мама, тата – гэта я”. Яна завяршае альбом, і вось там спявае дзіцячы хор”.

Назва новага альбома – “ 06” – тлумачыцца найперш тым, што большая частка матэрыялаў для яго была напісаная ў 2006-м годзе.

Лявон Вольскі: “Год быў такі багаты на падзеі. Была вялікая студэнцкая рэвалюцыя – мы там адхадзілі… Мы як на работу туды хадзілі штовечар. Гэта запомнілася – і на альбоме ёсць песні, наўпрост прысвечаныя гэтым падзеям. Насамрэч усё пісалася шчыра і не змушана”.

Паводле “Еўрапейскага радыё для Беларусі” ( www. belradio. fm)