Мілінкевічу шукаюць новага прэс-сакратара

Журналіст Павел Мажэйка сыходзіць з пасады прэс-сакратара старшыні Палітсавета дэмсілаў Аляксандра Мілінкевіча. “Не шукайце сенсацый – гэта працоўны момант”, – сказаў “Салідарнасці” Павел.

– Не было і няма ніякіх сварак, ніякіх праблем у адносінах, – працягнуў журналіст, які сыходзіць з пасады прэс-сакратара 28 красавіка. – Калі я займаў гэтую пасаду ў 2005 годзе, у нас былі пэўныя задачы. У выніку, мы дабіліся таго, што Мілінкевіч стаў успрымацца як альтэрнатыва Лукашэнку і ў Беларусі, і ў свеце. Зараз іншая палітычная сітуацыя, іншыя мэты, для вырашэння якіх патрэбныя новыя персоны ў прэс-службе. Так што сысці з гэтай пасады было маім асабістым рашэннем. Я рады, што яго зразумеў і Аляксандр Мілінкевіч, і чальцы штабу.

Павел Мажэйка адзначыў, што яшчэ не вызначыўся, чым будзе займацца далей.

Зараз, па словах Паўла, на яго пасаду разглядаецца некалькі кандыдатур. Імёны гэтых людзей пакуль не называюцца.

Паводле www.gazetaby.com