Выстава да юбілею беларускага тэатру ў Даўгапілсе

У Цэнтры беларускай культуры ў Даўгапілсе адбылася выстава “Беларускаму тэатру – 85”, прысвечаная гісторыі беларускага тэатра. Ён існаваў амаль стагоддзе таму ў тагачасным Дзвінску. Матэрыялы для выставы былі прадстаўлены сябрам таварыства “Уздым” гісторыкам Міколам Паўловічам з асабістага архіву.

Да выставы была прымеркавана таксама прэм’ера камедыі “Мікітаў лапаць”. Яе падрыхтавалі самадзейныя артысты таварыства “Уздым”. На працягу ўжо некалькіх гадоў у таварыстве “Уздым” існуе калектыў удзельнікаў народных каляндарных святаў і тэатральных пастановак пад кіраўніцтвам Галіны Сантоцкай. Калектыў спрабуе адрадзіць добрую традыцыю нашых папярэднікаў, калі ў горадзе пры тагачаснай беларускай дзяржаўнай гімназіі існаваў і плённа працаваў беларускі народны тэатр, а маладыя артысты гэтай гімназіі, дзякуючы падтрымцы Яніса Райніса, былі запрошаны для выступлення ў нацыянальны тэатр Рыгі.

У гэтым годзе ў Цэнтры беларускай культуры плануецца стварыць краязнаўчы куток, дзе стала будуць дзейнічаць аўтарскія выставы Міколы Паўловіча, прысвечаныя гісторыі беларусаў Латгаліі.

Таццяна Бучэль, Даўгаўпілс