Абвешчаны спаборніцтва для школьнікаў на ўдзел у “Народным альбоме”

Рэспубліканскае грамадскае аб’яднанне “Таварыства беларускай школы” аб’явіла конкурс для школьнікаў на ўдзел у міжнародным праекце, вынікам якога будзе новая пастаноўка музычнага спектаклю “Народны альбом”. Рэпетыцыі і паказы спектаклю адбудуцца падчас летніх вакацыяў у Беларусі і Польшчы – у гарадах Варшава, Гданьск, Закапанэ.

Да ўдзелу ў спаборніцтве запрашаюцца навучэнцы 8 – 10 класаў, якія маюць акцёрскія і вакальныя здольнасці. Вітаецца ўдзел вучняў з сярэдніх школ і класаў з тэатральным, мастацкім, музычным, харэаграфічным ухіламі, а таксама навучэнцаў школаў мастацтваў. Аднак могуць браць удзел і падлеткі, якія не навучаюцца ў спецыялізаваных класах ці мастацкіх школах.

Жадаючыя паспрабаваць сябе могуць тэлефанаваць на (029) 692 55 13, (029) 333 15 56.

Гэта будзе ўжо трэцяя пастаноўка “Народнага альбому” з удзелам таленавітых навучэнцаў. Прэм’ера была падрыхтавана ў калектыве Нацыянальнага дзяржаўнага гуманітарнага ліцэю імя Якуба Коласа. Летась адбылася другая пастаноўка. Дзеянне спектаклю разгортваецца ў 30-х гг. мінулага стагоддзя ў Заходняй Беларусі, якая ў той час знаходзілася ў складзе Польшчы. Пастаноўкі спектаклю мелі вялікі поспех сярод беларускіх і польскіх гледачоў.

Паводле belngo.info