Міністр адукацыі адказаў Мілінкевічу

Аляксандр Радзькоў пракаментаваў прапанову А. Мілінкевіча аб стварэнні Еўрапейскіх цэнтраў інфармацыі пры ВНУ.

“У Беларусі пакуль няма неабходнасці ў стварэнні ў ВНУ еўрапейскіх цэнтраў інфармацыі аб правах чалавека і дэмакратыі”, — заявіў сёння на прэсавай канферэнцыі міністр адукацыі Аляксандр Радзькоў.

З ініцыятывай стварэння такіх цэнтраў выступіў старшыня Палітычнай рады аб’яднаных дэмакратычных сіл Аляксандр Мілінкевіч у Страсбургу падчас сустрэч з кіраўніцтвам Парламенцкай асамблеі Рады Еўропы. Паводле Мілінкевіча, еўрапейскія цэнтры могуць быць створаныя па ўзору Цэнтру еўрапейскай дакументацыі і інфармацыі, што дзейнічае пры БДУ, але з прынцыповай розніцай — цэнтры павінны з’явіцца ва ўсіх ВНУ краіны, а іх праца павінна каардынавацца прадстаўнікамі Рады Еўропы альбо Еўрасаюзу.

“У нас ёсць спецыяльныя курсы, нават у школе мы праходзім гэтыя пытанні ў межах курса “Чалавек. Грамадства. Дзяржава”,— пракаментаваў гэты праект міністр адукацыі А. Радзькоў. — Мы лічым, што на гэтым этапе гэтага дастаткова”.

У той жа час ён не выключыў, што пытанне аб стварэнні цэнтраў будзе разгледжана і вывучана, “калі будзе такая неабходнасць”.

Паводле Радыё “Свабода” ( www. svaboda. org)