У Варшаве ўшанаваная памяць прадзеда Паўла Севярынца

На Радаўніцу беларусы, якія жывуць у Варшаве, ушанавалі памяць беларусаў, пахаваных у польскай сталіцы. Упершыню была ўшанаваная памяць прадзеда Паўла Севярынца – Міхаіла Буцькі, чыю магілу знайшлі напярэдадні варшаўскія беларусы.

Наведванне могілак, дзе пахаваныя беларусы, пачалося практычна ад самай раніцы – трэба было наведаць магілы ў розных частках польскай сталіцы. Беларусы, а гэта былі пераважна маладыя людзі – студэнты і аспіранты – ушанавалі памяць мінскага ўніяцкага святара і беларускага дзеяча Вацлава Аношкі, потым генерала Станіслава Булак-Балаховіча і ягоных жаўнераў, былога кіраўніка СБМ у Наваградку Янкі Жамойціна.

Удзельніца акцыі Наста Ільіна распавяла: “Гэта звязана з нашай гісторыяй. Першая сусветная вайна, другая, потым эміграцыя. Так аказалася, што шмат беларусаў пахаваныя ў Варшаве і іншых месцах Польшчы”.

Сёлета маладыя беларусы, якія жывуць у Варшаве, зрабілі таксама адкрыццё – паводле словаў Насты Ільіной, у польскай сталіцы пахаваны таксама прадзед Паўла Севярынца – праваслаўны святар айцец Мітрафан – у міры Міхаіл Буцька.

Каля кожнай магілы былі прачытаныя малітвы і запаленыя свечкі.

Паводле Радыё “Свабода” ( www. svaboda. org)