Гісторыкі змагаюцца за гістарычны цэнтр Магілёва

Магілёўскія гісторыкі дамагліся перапынення будаўніцтва двух аб’ектаў ў гістарычнай частцы Магілёва – на пешаходнай вуліцы Ленінскай і беразе ракі Дубравенка. Падрадчыкі распачалі будоўлю без неабходнага дазволу і нагляду археолагаў. Цяпер на месцы катлаванаў працуюць студэнты Магілёўскага дзяржаўнага ўніверсітэту імя Аркадзя Куляшова.

Будаўніцтва пачалі прыкладна месяц таму. За гэты час будаўнікі выкапалі катлаваны і пачалі заліваць фундамент. Пра знішчэнне гістарычнага слою на месцы будоўлі даведаліся студэнты. Яны паведамілі ва ўніверсітэт. Гісторыкі пачалі тэлефанаваць у гарвыканкам і ўрэшце дамагліся прыпынення будаўніцтва.

Культурны слой на будоўлі вуліцы Ленінскай утрымлівае звесткі ад часоў Рэчы Паспалітай – шаснаццатага, сямнаццатага стагоддзяў. Паводле доктара гістарычных навук Ігара Марзалюка тое, што ўдалося захаваць ад знішчэння мае велізарнае значэнне для гісторыі Магілёва.

“Тут падарунак для археолага. Горад – гэта жывы арганізм, ён пастаянна будуецца. У саракавых, пяцідзесятых, шасцідзесятых гадах не існавала ахоўных зон. Таму капалі бульдозерамі, як хацелі і вельмі рэдка археолагу шанцуе, каб захавалася стратыграфія. Вось паглядзіце якая тут калонка – чорны насычаны слой. У гэтым слоі як у старажытным Ноўгарадзе, у ідэальным стане захоўваецца косткі, скура, тыя рэчы, якія ў другіх частках Магілёва не фіксуюцца, а тут усё захавалася”, – адзначае ён.

Менш пашанцавала культурнаму слою на месцы другога будаўніцтва – на беразе Дубравенкі. Будаўнікі папросту згарнулі яго пад адхон, а частку ўжо паспелі вывесці. Ігар Марзалюк збіраецца скардзіцца на самаўпраўства чыноўнікаў управы архітэктуры, якія далі дазвол на будаўніцтва. Ігар Марзалюк здзіўляецца, як будаўніцтва магло пачацца ў вызначанай гістарычнай частцы Магілёва без нагляду археолагаў. На этапе зацвярджэння дакументацыі будаўнікоў абавязваюць узгадніць будаўнічыя работы з археолагамі.

У будаўнічых арганізацыях адмовілі каментаваць канфліктную сітуацыю. Тым часам моладзевыя актывісты збіраюцца дапамагчы студэнтам у іхных раскопках.

Паводле Радыё “Свабода” ( www. svaboda. org)