Міжнародных рэакцыя на беларускія падзеі

(Агляд замежнай прэсы)

***

Міжнародная прэса каментавала замежнае турнэ прэзідэнта Венесуэлы Уга Чавеса, якое пралягала і праз Беларусь. Амерыканскае выданне “The Wall Street Journal” адзначыла, што “Чавес пахваліў аўтарытарнае кіраванне прэзідэнта Лукашэнкі і паабяцаў знайсці шляхі пашырэння гандлёвых сувязяў паміж дзвюма краінамі”. Газета таксама падкрэсліла, што “мэта ўсясветнага турнэ венесуэльскага лідэра – назбіраць хаўруснікаў дзеля геапалітычнай супрацьвагі ЗША”.

Брытанская “Financial Times” лічыць, што “вось зла” пераўтвараецца ў “кола антаганізму”, і што маршрут Чавеса, які ахоплівае Беларусь, Іран, В’етнам і Малі, часткова скіраваны на тое, каб павялічыць шанцы Венесуэлы атрымаць месца ў Радзе Бяспекі ААН.

Расійская “Новая газета” напісала, што яднаюцца два прэзідэнты на пазіцыі антыамерыканізму: “Яны па-сапраўднаму пасябравалі за гэтыя два дні – Уга і Аляксандр. Высветлілася, што ў іх шалёна шмат агульнага. І гэта не толькі адсутнасць шанцаў быць дапушчанымі нават на парог прыстойных дамоў. Не толькі чорная фарба, якой зафарбоўваюць абедзве дзяржавы на мапе свету. Не толькі анекдоты. Галоўная сіла, якая іх яднае, – гэта лютая нянавісць да Амерыкі і шчырая перакананасць у тым, што калі б не было Штатаў, дык і праблемаў у абодвух ізгояў не было б зусім”.

***
На гэтым тыдні ў Мінску распачаўся закрыты працэс над актывістамі незарэгістраванай арганізацыі “Партнёрства” Міколам Астрэйкам, Энірай Браніцкай, Цімохам Дранчуком і Аляксандрам Шалайкам. За працэсам сочаць заходнія дыпламаты, якія ўчора прыйшлі да будынку суда Цэнтральнага раёна Мінска, каб прадэманстраваць пазіцыю сваіх краінаў. Гаворыць пасол Вялікай Брытаніі ў Мінску Браян Бэнет: “Мы тут, каб паказаць, што мы пільна сочым за гэтым працэсам, і каб прадэманстраваць нашу падтрымку дэмакратычным пераўтварэнням у краіне. А таксама каб паказаць уладам, што мы занепакоеныя развіццём сітуацыі і тым, як яны ставяцца да актывістаў “Партнёрства”, у прыватнасці. Мы хацелі б бачыць на волі ўсіх, хто тут абараняе дэмакратычныя прынцыпы, і патрабуем іх вызваліць з турмаў”.

Латвія выказала пратэст супраць ператрусу ў кватэры яе дыпламата ў Мінску, які правялі ўначы 25 ліпеня прадстаўнікі сілавых структураў Беларусі. Прэс-сакратар знешнепалітычнага ведамства Латвіі Аціс Лотс адзначыў, што было парушана міжнароднае права: “Адбыўся беспрэцэдэнтны выпадак. Хачу нагадаць, што жыллё дыпламата знаходзіцца па-за юрысдыкцыяй дзяржавы знаходжання, і дыпламат, а таксама ягонае жыллё, карыстаецца ўсімі прывілеямі ды імунітэтам, як прадугледжана Канвенцыяй пра дыпламатычныя стасункі 1961 года”.

Міністр замежных спраў Латвіі Арціс Пабрыкс заявіў, што “гэта быў не толькі напад на дыпламата, але і на Латвію”. Паводле міністра, “гэта, відавочна, паўплывае на думку Еўрасаюза і дыскусію па Беларусі”.

***

На гэтым тыдні завяршыў дыпламатычную місію ў Мінску пасол ЗША Джордж Крол. Ён пакінуў Беларусь. На развітанне ў эксклюзіўным інтэрв’ю Радыё “Свабода” спадар Крол сказаў: “Жадаю ўсім беларусам свабоды і мірнага жыцця. Каб грамадзяне краіны не сядзелі ў турмах за свае палітычныя ці рэлігійныя погляды. І ўсіх беларусаў, якія цяпер сядзяць у турме, трэба вызваліць. Я жадаю ўсім беларусам міру і лепшай будучыні ў дэмакратычнай і свабоднай краіне, як тое і належыць”.

Паводле www.svaboda.org