“Для нармалізацыі стасункаў з Польшчай Беларусь павінна спыніць рэпрэсіі”

Пра гэта міністр замежных спраў Польшчы Ганна Фатыга заявіла ў інтэрв’ю міжнароднаму інтэрнэт-парталу “Wider Europe”, якое абнародавана 31 ліпеня.

Паводле яе, Польшча зацікаўленая ў нармалізацыі стасункаў з Беларуссю. “Нашы народы аб’ядноўвае агульная гісторыя, блізкасць моў, агульныя традыцыі, шматвяковыя эканамічныя, палітычныя і культурныя сувязі”, – зазначыла міністр.

Яна, аднак, дадала, што “ў імя далейшага развіцця двухбаковых адносінаў, а таксама прымаючы да ўвагі агульнапрынятыя еўрапейскія стандарты, беларускія ўлады павінны спыніць ужыванне рэпрэсіяў у дачыненні да апазіцыі і грамадзянскай супольнасці, а таксама адмовіцца ад практыкі стварэння негатыўнага вобразу Польшчы ў афіцыйных беларускіх сродках масавай інфармацыі”, – заявіла кіраўнік польскага знешнепалітычнага ведамства.

Паводле спадарыні Фатыгі, сур’ёзны неспакой уладаў Польшчы выклікае “парушэнне ўладамі Беларусі грамадзянскіх правоў, у тым ліку права на свабоду слова, на атрыманне інфармацыі з незалежных крыніц, свабоды дзейнасці прафсаюзаў, права на вядзенне свабоднай гаспадарчай дзейнасці”. “Яшчэ адной важнай праблемай з’яўляецца становішча польскай меншасці ў Рэспубліцы Беларусь”, – заявіла кіраўнік польскага МЗС.

Радыё “Свабода”