Глава чэшскай дыпмісіі падтрымаў Казуліна

26 ліпеня часовы павераны ў справах Чэшскай Рэспублікі ў Рэспубліцы Беларусь Уладзімір Румл накіраваў ліст экс-кандыдату ў прэзідэнты, лідэру Беларускай сацыял-дэмакратычнай партыі (Грамада) Аляксандру Казуліну. Аб гэтым паведамляе прэс-служба партыі.

Нагадаем, што 13 ліпеня палітык быў прызнаны вінаватым у здзяйсненні хуліганства і арганізацыі масавых беспарадкаў і прысуджаны да пяці з паловай гадоў пазбаўлення волі. Абарона палітыка абскардзіла гэты прысуд.

Як адзначаецца ў лісце, чэшская амбасада ў Беларусі “ўважліва назірала” за дзейнасцю А.Казуліна да, пасля і падчас выбарчай кампаніі і “заўсёды імкнулася аб’ектыўна яе ацэньваць”. “Што датычыцца ўсіх падзей, у прыватнасці Вашага затрымання і прысуду, якія я лічу скандальнымі, дазволю сабе выказаць Вам глыбокую сімпатыю”, — піша У.Румл. Ён ацэньвае А.Казуліна як “рашучага, мужнага, маральнага і свабодалюбнага чалавека, які неабходны Беларусі, дэмакратычнай Еўропе і ўсяму свету”. “Трымайцеся, пераадольвайце ўсе цяжкасці — мы з Вамі і думаем аб Вас”, — гаворыцца ў лісце главы чэшскай дыпмісіі ў Беларусі.

БелаПАН