Пасол ЗША Джордж Крол пакінуў Беларусь

Пасол ЗША Джордж Крол завяршыў дыпламатычную місію і 24 ліпеня пакінуў Беларусь. Перад тым, як выправіцца ў аэрапорт і вылецець на радзіму, ён наведаў Курапаты, Усходнія могілкі Мінска, а таксама даў інтэрв’ю радыё “Свабода”.

На развітанне з Беларуссю Джордж Крол усклаў кветкі каля мемарыяльнага знаку ў Курапатах, на плошчы Перамогі, а таксама да магіл Васіля Быкава і Уладзіміра Караткевіча.
— Гэта мой апошні дзень у Беларусі ў якасці амбасадара Злучаных Штатаў Амерыкі, — гаворыць спадар Крол, — і сёння я ад’язджаю. Тут ляжаць слынныя Васіль Быкаў і Уладзімер Караткевіч. Гэтае месца вельмі значнае для беларусаў і ўсіх сяброў Беларусі. І для мяне асабіста вялікі гонар быць сёння з імі і пакласці кветкі да магіл Быкава і Караткевіча. Лічу, што ў маёй душы Беларусь — як другая радзіма... Жадаю ўсім беларусам свабоды і мірнага жыцця. Каб грамадзяне краіны не сядзелі ў турмах за свае палітычныя ці рэлігійныя погляды. І ўсіх беларусаў, якія цяпер сядзяць у турме, трэба вызваліць. Я жадаю ўсім беларусам міру і лепшай будучыні ў дэмакратычнай і свабоднай краіне, як тое і належыць.

Паводле радыё “Свабода”