Мірскі замак святкуе юбілей?..

Паўтары гады прайшло ад народжанай ідэі да рэалізацыі ўнікальнага праекта Нацыянальнага мастацкага музея Рэспублікі Беларусь і Гомельскай кандытарскай фабрыкі “Спартак” — выпуску цукерак “Спадчына Беларусі” і шакаладак “Мірскі замак”, дзе на ўпакоўку вынесены брэнд Беларусі — Мірскі замак.

У час IV Беларускага фестывалю мастацтваў “Мірскі замак” намеснік дырэктара па навуцы Нацыянальнага мастацкага музея Рэспублікі Беларусь Н.М.Усава прэзентавала салодкую прадукцыю, і яго смак змаглі ацаніць журналісты ў час прэс-канферэнцыі ў Мірскім пасялковым Савеце. Прыемнай нечаканасцю стаў і той факт, аб якім паведаміў кандыдат гістарычных навук, старшы навуковы супрацоўнік Інстытута гісторыі НАН Беларусі Ю.А.Заяц, назваўшы канкрэтную дату заснавання замка ў Міры — 1506 год. Мяркуючы па гэтай выснове Мірскі замак адзначае 500-гадовы юбілей.

Між тым, салодкая прадукцыя, дзе на ўпакоўку вынесены нацыянальны брэнд — Мірскі замак, пабывала нават на міжнароднай выставе All Candy ў Чыкага (ЗША). Унікальны праект ОНТ, дзе адбыліся чатыры канцэрты ля сцен Мірскага замка, таксама можна лічыць своеасаблівым падарункам да юбілею замка. Бо такой колькасці наведвальнікаў Мір і жамчужына Сярэднявечча — Мірскі замак яшчэ не бачылі. А гарпасёлак Мір, дзякуючы традыцыйным штогадовым фестывалям мастацтваў “Мірскі замак” паступова ператвараецца ў фестывальную сталіцу Гродзеншчыны.

Пётр Жэбрак