“Эўрабеларусь” — Старонка Беларускага Шуманаўскага Таварыства

Беларускае Шуманаўскае Таварыства было створана ў лютым 2002 г. у Мінску і афіцыйна зарэгістравана ў верасні 2003 г. у Варшаве пад назвай “Bialoruskie Stowarzyszenie imienia Roberta Schumana”. Галоўнымі мэтамі Таварыства з’яўляецца фарміраванне пазітыўнага стаўлення да ідэі еўрапейскай інтэграцыі ў беларускім грамадстве і стварэнне інтэлектуальнага падмурку для пачатку далучэння Беларусі да Еўрапейскага Саюзу.

Сайт Беларускага Шуманаўскага Таварыства (http://www.eurabelarus.org/) створаны пры падтрымцы Міністэрства замежных спраў Чэшскай Рэспублікі і Фундацыі імя Стэфана Баторыя (Польшча). Ён цалкам беларускамоўны, інфармацыйны і цікавы.

Структура электроннай старонкі і яе галоўная тэматыка цалкам адпавядаюць мэце таварыства: інтэграцыі Беларусі і Еўропы. Сайт падзелены на чатыры асноўных раздзела:

1. “Адзіная Эўропа: гісторыя і сучаснасць”, дзе змешчана ўся інфармацыя аб Радзе Еўропы, Еўрапейскім Саюзе, Канстытуцыя і аналітыка на гэтую тэму;
2. “Беларусь і Эўропа”, дзе можна пачытаць аналітыку аб “поглядзе”з Беларусі” і “поглядзе з Еўропы”;
3. У раздзеле “Магчымасць навучання і супрацоўніцтва з Эўрапейскім Зьвязам” Вы можаце даведацца пра навучанне ў Польшчы, Літве, Латвіі, Эстоніі, Чэхіі, Германіі, Францыі, Вялікабрытаніі, Нідэрландах, Швецыі, Ірландыі;
4. Раздзел “Дапамога эўрапейскім школам на Беларусі” утрымлівае інфармацыю па Рэспубліканскім школьным конкурсе “Што я ведаю пра Эўропу”, які штогод праводзіць Шуманаўскае таварыства; таксама навіны пра школьныя еўрапейскія клубы і ў дапамогу настаўнікам тэорыю еўрапейскай адукацыі ў школе.

У гарызантальным меню Вы можаце яшчэ прагледзіць спасылкі з навінамі Еўрасаюзу, з інфармацыяй пра Беларускае Шуманаўскае таварыства, наведаць Гасцёўню і Дыскусійны форум.

Адзіная нязручнасць у сайта — гэта размяшчэнне пераходу на галоўную старонку, дзе змешчаны навіны таварыства і аператыўная свежая інфармацыя. Шукаць спасылку на яе трэба ў самым нізе старонкі (ў дадатковым меню).

Інфармацыйны цэнтр МГА “ЗБС “Бацькаўшчына”