Экс-суддзя Канстытуцыйнага суду Беларусі стаў на бок абароны Казуліна

Па меркаванні былога суддзі Канстытуцыйнага суду Міхаіла Пастухова, супрацьпраўных дзеянняў Аляксандр Казулін не здзяйсняў. У той жа час Міхаіл Пастухоў лічыць, што працэс над Казуліным паказвае: у краіне – прававое бязмежжа. “Для кагосьці законы ўжываюцца, а для кагосьці не”, — перакананы экс-суддзя Канстытуцыйнага суду.

“Ствараецца ўражанне, што пракуратура ўхілілася ад рэагавання на супрацьпраўныя дзеянні, якія былі здзейсненыя ў дачыненні Аляксандра Казуліна. Судзячы па рэакцыі ў судзе дзяржаўнага абвінаваўцы, яна нават не жадае іх заўважаць” – заявіў у інтэрв’ю БелаПАН доктар юрыдычных навук Міхаіл Пастухоў.

У прыватнасці, юрыст мяркуе, што паводзіны Аляксандра Казуліна, калі той пасля затрымання стукнуў па партрэце прэзідэнта, былі эмацыйнымі. “Калі Казулін ва УУС Кастрычніцкага раёна Мінска стукнуў па партрэце Лукашэнкі, ён адназначна дзейнічаў эмацыянальна. Немагчыма кваліфікаваць гэтыя дзеянні як хуліганства, паколькі для кваліфікацыі хуліганства патрабуецца не эмацыйнае, а менавіта умыснае дзеянне, якое мае мэту парушыць грамадскі парадак, прычым з адмысловым цынізмам”, — гаворыць Міхаіл Пастухоў.

Судовы працэс над Аляксандрам Казуліным вядзе суддзя Аляксей Рыбакоў. Ён напярэдадні суду адхіліў хадайніцтвы, пададзеныя абаронай і самім абвінавачаным. У прыватнасці, суддзя адмовіў Аляксандру Казуліну ў змене меры утрымання, задаволіць хадайніцтва аб выкліку ў суд шэрагу сведак, а таксама дазволіць дачцы Аляксандра Казуліна абараняць бацьку.

Паводле www.telegraf.by