У Вільні прадстаўлены беларускія кнігі

Вільня (сталіца сённяшняй Літвы) — першы горад, які прымае перасоўную выставу беларускіх кніг. Выстава была адкрыта 3 ліпеня і працягнецца да 28, у Нацыянальнай бібліятэцы Літвы ім.М. Мажвідаса. Экспазіцыя прымеркаваная да Дня Незалежнасці Рэспублікі Беларусь.

Міністэрства інфармацыі Беларусі сфармавала бібліятэку з 275 выданняў. Гэта альбомы, слоўнікі, энцыклапедыі, даведнікі, падручнікі, кнігі для дзяцей, даведнікі, карты і інш. Аснову экспазіцыі складае кніжная прадукцыя шасці дзяржаўных выдавецтваў — “Беларусь”, “Выдавецкая хата “Беларуская навука”, “Беларуская энцыклапедыя імя Петруся Броўкі”, “Вышэйшая школа”, “Мастацкая літаратура”, “Народная асвета”, а таксама іншых выдавецкіх структур — Менскай фабрыкі каляровага друку, рэдакцыйна-выдавецкай установы “Літаратура і мастацтва”, Беларускага тэлеграфнага агенцтва. Частка экспазіцыі прадстаўленая прадукцыяй недзяржаўных выдавецтваў — “Аверсэв”, “Тетрасистемс”, “Рыфтур”.

Адначасова ў Нацыянальнай бібліятэцы Літвы ім.М.Мажвідаса адчыніцца выстава карцін беларускага мастака Мікалая Бушчыка. У экспазіцыю ўключана 20 прац майстра.

Плануецца, што пазней выставу ўбачаць у Польшчы, а ў верасні беларускія кнігі будуць экспанавацца ў Галандыі.

www.naviny.by