“Вялікае княства паэтаў”

Прэзентацыя міжнароднага музычна-паэтычнага праекту “Вялікае княства паэтаў” (“Magnus Ducatus Poesis”) прайшла 5 ліпеня ў амбасадзе Літвы ў Мінску.

Адчыняючы вечар, амбасадар Літвы Пятрас Вайтекюнас паведаміў, што ў аснову праекту легла “духоўная, культурная спадчына Вялікага княства Літоўскага, яго цывілізацыйная скіраванасць”. Дыпламат адзначыў, што ідэя праекту нарадзілася ў Мінску і яго прэзентацыя была прымеркаваная да дня каранавання караля ВКЛ Міндоўга, які ў 1253 годзе стаў першым і апошнім князем. “Творчасць, воля і адказнасць не падуладныя часу”, — падкрэсліў літоўскі амбасадар.

Паэты з Беларусі, Літвы, Польшчы, Украіны прачыталі прысутным свае творы, а таксама пераклады на сваю родную мову вершаў прысутных калегаў. Ад Беларусі ў прэзентацыі ўдзельнічалі Уладзімір Арлоў, Андрэй Хадановіч і Марыя Мартысевіч. Рускамоўная паэзія была прадстаўленая паэтам з Літвы Георгіем Яфрэмавым. Выступ паэтаў суправаджаўся імправізацыямі на старажытных музычных інструментах, у тым ліку дудзе, беларускім, латвійскім і літоўскім музыкантамі.

Як заявіў у інтэрв’ю БелаПАН натхніцель праекту “Вялікае княства паэтаў” літоўскі паэт і перакладчык Владас Бразюнас, яго ўдзельнікі загадзя не рэпетавалі. Былі абмеркаваныя тэксты, якімі абмяняліся для перакладу, непасрэдна перад прэзентацыяй тэксты праглядзелі музыкі, каб мець паданне аб змесце, якое ім маецца быць расчыніць музычна.

Арганізатары не выключаюць, што праект “Magnus Ducatus Poesis” можа стаць традыцыйным, паколькі вечар прайшоў паспяхова, спадабаўся не толькі гледачам, але і выступоўцам. Паэты, у прыватнасці, адзначылі ўменне беларускай публікі слухаць і разумець паэзію і музыку.

БелаПАН