Акцыя салідарнасці ў Бруселі

Пытанне пра палітычных зніклых і рэпрэсіі застаецца адным з галоўных у спісе пытанняў па Беларусі і нікога не пакідае абыякавым. Гэта пацвярджае акцыя салідарнасці, якую арганізаваў Беларускі цэнтр у Бруселі побач з уваходам ў Еўрапарламент, дзе сёння павінен прайсці круглы стол па беларускім пытанні ў рамках сесіі Парламенцкай Асамблеі АБСЕ.

Мы памятаем пра тое, што шэсць гадоў таму (7 ліпеня 2000 г.) быў выкрадзены Зміцер Завадскі, лёс якога да гэтага часу невядомы.

Мы памятаем пра тое, што заўтра адбудзецца суд над Аляксандрам Казуліным, экс-кандыдатам у прэзідэнты Рэспублікі Беларусь.

Мы памятаем пра звольненых з працы, пра выключаных з ВНУ студэнтах, пра арыштаваных і тых, хто адбывае пакаранне, пра герояў намётавага гарадка — пра ўсіх тых, хто змагаецца за вольную дэмакратычную Беларусь.

Наша салідарнасць робіць нас згуртаванымі, моцнымі і з кожным днём набліжае да перамогі.

У пікеце прымалі ўдзел Анатоль Лябедзька і Сяргей Калякін.

Беларускі цэнтр,
Бельгія