Брусель аб Беларусі

Парламенцкая асамблея АБСЕ абвясціла аб падрыхтоўцы круглага стала па Беларусі, на які запрасілі прадстаўнікоў беларускага парламента і апазіцыі. Анатоль Лябедзька і Сяргей Калякін ужо пацвердзілі свой удзел у мерапрыемстве, а вось парламенцкая дэлегацыя на чале з віцэ-спікерам Сяргеем Забалотцам пакуль не.

Лідэраў апазіцыі запрасіла кіраўнік адмысловай групы па справах Беларусі ПА АБСЕ Ута Цапф. Анатоль Лябедзька ўжо прыбыў у Брусель, дзе будзе праходзіць круглы стол, Сяргей Калякін прыбудзе ў сераду.

Па словах Анатоля Лябедзькі, дыскусія па Беларусі пройдзе ў любым выпадку, аднак ПА АБСЕ чакае, што беларуская дэлегацыя ад парламента ўсё ж такі прыбудзе для ўдзелу. Яшчэ лідэр АГП у інтэрв’ю беларускай службе радыё “Свабода” паведаміў: “Я прасіў аб сустрэчы з прэзідэнтам Парламенцкай Асамблеі. Было б добра, каб яна прайшла ў сераду, па прыездзе Сяргея Калякіна, бо было б добра сустрэцца з прэзідэнтам Асамблеі разам”.

Падчас новай сесіі ПА АБСЕ будзе вылучаны новы прэзідэнт арганізацыі, бо паўнамоцтвы папярэдняга заканчваюцца. Анатоль Лябедзька выказаў сумненні, што новы прэзідэнт ПА АБСЕ пажадае прыехаць у Беларусь.

“Я лічу, што гэта няўчасна. Яшчэ не зажылі раны пасля выбарчай кампаніі, а магчымы прыезд будзе разглядацца і падавацца выключна як легітымізацыя, няхай і ўскосная, таго, што здарылася ў Беларусі”, — лічыць лідэр АГП.

Раней прэзідэнт іншай еўрапейскай арганізацыі — ПАСЕ — Рэне Ван Дэр Лідэн заявіў, што “Радзе Еўропы неабыякава будучыня Беларусі”. “Я асабіста супраць ізаляцыі Беларусі, у чым вы маглі ўпэўніцца на практыцы. Нягледзячы на санкцыі з боку Еўрасаюза, на мінулую сесію ПАСЕ мы накіравалі запрашэнне старшыне парламента гэтай краіны і лідэру апазіцыі, але яны не прыбылі ў Страсбург па розных прычынах”, — паведаміў глава ПАСЕ.

Паводле www.telegraf.by