“Песні Свабоды — 2” на Дзень Незалежнасці

Клопатам аб выданні другой часткі “Песень Свабоды” працягвае сваю дзейнасць незалежны музычны лэйбл “VoliaMusic”. Рэліз дыску будзе прымеркаваны да Дня аднаўлення Незалежнасці Беларусі — 27 ліпеня, таму асноўнымі тэмамі, песняў на якія чакаюць выдаўцы ад гуртоў, стануць Свабода і Незалежнасць.

Неабходнасць выдання другой часткі “Песень Свабоды” выдаўцы тлумачаць некалькімі прычынамі. Распавядае дырэктар незалежнага лэйблу “Puper”: “У першую чаргу, гэта звязана з вялікай актыўнасцю музычных калектываў, якія дасылаюць шмат песняў за свабоду. Ды і падчас працы над першым дыскам шмат добрых песняў давялося адкінуць з-за недахопу месца на CD”.

Акрамя таго, ідэя другога дыску выклікана вялікай запатрабаванасцю і цікаўнасцю да першых “Песень Свабоды”: болей за тысячу чалавек падпісалася на дыск толькі папярэдне, каля 50 000 спамаванняў з інтэрнэту!

“Праект “Песень Свабоды” атрымаў розгалас і цікавасць большую, нават, чым мы планавалі і чакалі, — кажа “Puper”. — Гэта быў не проста дыск, а з’ява, сімвал. Гэта быў галоўны кампакт пляцу Каліноўскага, калі там стаяла моладзь, а “Наша Ніва” паставіла яго ў адзін шэраг з такімі атрыбутамі як бел-чырвона-белы сцяг. Гэта вельмі паважна і адказна”.
Дарэчы, дыск з песнямі Свабоды спадабаўся і быў высока ацэнены прадзюсерамі ўкраінскага лэйблу "Аtlantic-records", якія выдавалі дыскі ўкраінскага Майдану.

Рэліз дыску мае адбыцца на Дзень аднаўлення Незалежнасці Беларусі “27 ліпеня — важная дата для любога нармальнага беларуса, дзень прыняцця Дэкларацыі аб незалежнасці Рэспублікі Беларусь, дзень, калі беларусы зрабілі смелы учынак”, — тлумачыць дырэктар “VoliaMusic”.

Што тычыцца зместу “Песень Свабоды — 2”, выдаўцы абяцаюць прыкласці намаганні, каб з’явіліся новыя імёны — такія складанні даюць пэўны штуршок да развіцця маладых калектываў. Прапаноўваць свае музычныя кампазіцыі для зборнага дыску музычныя калектывы могуць да 27 чэрвеня праз e-mail: pesni2006@tut.by.

Падпіска на дыск адкрытая на сайце: http://za-svabodu.org.

Нагадаем — другая частка “Песень Свабоды” — трэці рэліз лэйбла “VoliaMusic”. Апроч “Песень” лэйбл выдаў дыск “Чарнобыльскі вецер” (пампаваць можна http://bsa.org.by/viecier), прысвечаны 20-ым угодкам Чарнобыля, а зараз апроч зборак пачынае працаваць і над рэлізамі асобных выканаўцаў: дасягнутая папярэдняя дамоўленасць з рэп-гуртом “Чырвоным па беламу” на выданне іх першых двух альбомаў, будуць весціся перамовы з гарадзенскім гуртом “Deviation”. Не пакідае незалежны лэйбл задумы выдаць і караоке-дыск, на якім было б сабрана 100 беларускіх песняў.

Алена Скарабагатава, “Тузін Гітоў”
www.music.fromby.net