Канскі Лёва за свабоду слова ў Беларусі

Акцыя “Свабода слова для Беларусі”, якую мінулай восенню ладзіла польская філія аўтарытэтнай праваабарончай арганізацыі “Міжнародная амністыя”, ўзнагароджаная Бронзавым львом на фестывалі міжнароднай рэкламы ў Канах.

Акцыя “Свабода слова ў Беларусі” палягала ў тым, што летась у лістападзе з ініцыятывы Міжнароднай амністыі два вядучых польскіх штодзённіка “Gazeta Wyborcza” i „Rzeczpospolita” выйшлі з амаль цалкам закрэсленымі тэкстамі на першых старонках – так, паводле аўтараў ідэі, выглядалі б гэтыя газеты пасля працы беларускіх цэнзараў.

Гэтаксама выглядалі і старонкі некалькіх вядучых інфармацыйных інтэрнэт-парталаў і радыёстанцый.

Да таго ж на вуліцах польскіх гарадоў былі развешаны 30 тысяч плакатаў са здымкамі вядомых беларускіх журналістаў і грамадскіх дзеячаў, якім скотчам заклеілі вусны.

Акцыя была настолькі заўважнай, што пра яе ў Польшчы памятаюць дагэтуль. А рашэнне журы фестывалю міжнароднай рэкламы ў Канах яшчэ раз нагадала польскай і міжнароднай грамадзкасці пра сітуацыю са свабодай слова ў Беларусі.

Па словах прадстаўніцы Міжнароднай амністыі Мірэлы Панэк: “Гэтая ўзнагарода – па-першае ўзнагарода свету рэкламы і даецца за прафесіяналізм у гэтай галіне. Але ў дадзеным выпадку ўсе памятаюць і ведаюць, што гаворка ідзе пра Беларусь. Я цешуся з таго, што рэкламны свет даведаўся больш пра сітуацыю ў Беларусі, бо, магчыма, што некаторыя і не ведалі, што там адбываецца. Я спадзяюся, што гэта не апошняя такая кампанія. Наша арганізацыя ахвотна будзе браць удзел у падобных акцыях”.
Для Міжнароднай амністыі кампанію “Свабода слова для Беларусі” падрыхтавала фірма “Saatchi & Saatchi Poland”. Паводле словаў кіраўніка фірмы Марка Жалендзёўскага, найбольш удалай часткай кампаніі было тое, што да яе пагадзіліся далучыцца дзве вядучыя польскія газеты, а таксама ўдалае супрацоўніцтва розных СМІ.

Паводле радыё “Свабода”