Калі адменяць штамп дазволу

Міністэрства ўнутраных спраў рэкамендуе грамадзянам Беларусі не афармляць штамп дазволу на выезд ва ўсе краіны свету больш як на два гады. Як паведамілі ў Дэпартаменце грамадзянства і міграцыі згаданага ведамства, ад 31 снежня 2007 году дазвольныя запісы плануецца скасаваць. Падобнага рашэння Канстытуцыйны суд Беларусі дамагаецца ад 2002 году.

На хадайніцтва экс-дэпутата Палаты прадстаўнікоў Уладзімера Парфяновіча Канстытуцыйны суд пастанавіў адмяніць дазвольны запіс яшчэ ў верасні 2002 году. І гэтае рашэнне, паводле намесніка кіраўніка Дэпартаменту грамадзянства і міграцыі Міністэрства ўнутраных спраў Аляксея Бегуна, урэшце трэба выконваць: “Адназначна, што гэтае пытанне разгледжанае і на калегіі МУС, і прэзідэнтам Рэспублікі Беларусь пастаўленая такая задача. Але юрыдычна гэта можна зрабіць толькі законам, гэта па-першае. Па-другое, неабходна стварыць адпаведныя ўмовы для таго, каб асобы, абмежаваныя ў праве на выезд, з краіны выехаць не змаглі, а асобы, не абмежаваныя ў гэтым праве, вольна б выязджалі і прыбывалі на тэрыторыю іншай дзяржавы. Найбліжэйшым часам мы яшчэ больш актывізуем працу дзеля стварэння ўмоў, каб штамп скасаваць”.

Паводле Аляксея Бегуна, цягам трох гадоў адбудзецца чарговая пашпартная “рэвізія”: будуць уведзеныя біяметрычныя пашпарты з лічбавым здымкам уладальніка, адбіткам пальцаў, звесткамі пра рост і вагу. Паралельна ствараецца адзіная сістэма ўліку грамадзянаў, якая знаходзіцца ў кампетэнцыі Дзяржаўнага памежнага камітэту. Між тым, ва ўпраўленні памежнага кантролю згаданага ведамства заявілі, што хоць сёння гатовыя адмовіцца ад патрабавання наяўнасці дазвольнага запісу.

Па словах прадстаўніка ўпраўлення: “Падрыхтоўка і афармленне дакументаў для выезду за мяжу ўваходзіць у кампетэнцыю Міністэрства ўнутраных спраў. Памежныя войскі толькі выконваюць нарматыўна-прававыя акты і заканадаўства Рэспублікі Беларусь. І калі на ўзроўні дзяржавы будзе прынятае рашэнне адзнаку скасаваць, то мы гатовыя хоць зараз гэтую функцыю не выконваць. Бо мы фігуруем толькі як выканаўцы”.

Суддзя Канстытуцыйнага суду Беларусі ў справах скасавання дазвольнага штампу Валянцін Шуклін вітае рашэнне МУС, аднак кажа, што трэба пачакаць з абвяшчэннем канчатковай даты, бо дагэтуль абвяшчаліся зусім іншыя тэрміны скасавання дазвольнага запісу: “Варта пачакаць, наколькі ўсё гэта будзе зроблена аператыўна. Таму што яшчэ некалькі гадоў таму прэзідэнт паставіў задачу, праект закону падрыхтаваны, які мусіць быць цяпер разгледжаны і прынятыя адпаведныя захады да выканання, перадусім, указам прэзідэнта Рэспублікі Беларусь і заключэння Канстытуцыйнага суду. Вось давайце і паглядзім, наколькі чыноўнікі выконваюць прадпісанні прэзідэнта і наколькі яны выконваюць заключэнні Канстытуцыйнага суду”.

Меркавалася, што штампы знікнуць з пашпартоў ад пачатку 2006 году. Аднак шэраг ведамстваў, перадусім, МУС і Дзяржаўны камітэт памежных войскаў, заявілі, што дадзеная працэдура дазваляе кантраляваць паток грамадзян, што едуць праз мяжу і адпаведнай замены яму ня знойдзена.

У Міністэрстве ўнутраных спраў адмовіліся пракаментаваць, ці будуць у выпадку скасавання штампу кампенсаваныя сумы, якія грамадзяне ўжо заплацілі за афармленне дазвольнага запісу ўключна да 2011 году. Пасля таго, як ад 2006 году штамп з пашпартоў ня знік, як было абяцана, бальшыня заяўнікаў аплацілі пошліну на пяць гадоў. Дзеянне штампу на кожны год каштуе 31 тысячу рублёў.

www.svaboda.org