Фестываль нацыянальных культур

VI Усебеларускі фестываль нацыянальных культур, які завяршаецца сёння ў Гародні, стаў самым маштабным і яркім за яго гісторыю. Аб гэтым паведаміла ў размове з карэспандэнтам БелТА намеснік старшыні Рэспубліканскага арганізацыйнага камітэта па падрыхтоўцы і правядзенні фэсту, намеснік старшыні Гарадзенскага аблвыканкама Марыя Бірукова.

У ім узялі ўдзел каля 800 самых таленавітых прадстаўнікоў 25 нацыянальнасцяў, якія пражываюць на тэрыторыі Беларусі. Пазалетась на пятым фэсце было прадстаўлена 22 нацыянальнасці.

Кожны з трох фестывальных дзён быў прысвечаны вызначанай тэматыцы: “Гарадзеншчына збірае сяброў”, “Народная творчасць — крыніца натхнення” і “Пераемнасць пакаленняў”. У гэтыя дні былі арганізаваныя паказ нацыянальнага кіно, кірмаш, спартовае спаборніцтва сярод дыяспар, канцэрты, свята нацыянальных кухняў і іншыя мерапрыемствы. На фэст прыехалі прадстаўнікі адміністрацыі Паўночна-Заходняй акругі Масквы, дэлегацыі з гарадоў-пабрацімаў Польшчы, Літвы, Францыі і іншых краін.

У дні фестывалю перад гарадзенцамі і гасцямі горада выступілі таксама прафесійныя калектывы і спевакі: ансамблі “Харошкі” і “Чырвона рута”, гурт “Тяни-Толкай”, артысты Саша Нэма, Галіна Шышкова, Ксенія Сітнік, Гюнэш Абасава і іншыя. А мастакі, скульптары, майстры мастацкага фота, прафесійныя кавалі, ганчары, ткачы, народныя ўмельцы выставілі свае працы ў горадзе майстроў. Гэтую выставу наведалі каля 50 тыс. чалавек.

Марыя Бірукова адзначыла, што гэты яшчэ малады фестываль ужо стаў знакам міжнацыянальнай садружнасці і міру на беларускай зямлі.

Па яе словах, Гарадзеншчына не выпадкова стала месцам правядзення фэсту. Гэты рэгіён з’яўляецца агульным домам для прадстаўнікоў 84 нацыянальнасцяў. Большасць жыхароў вобласці складаюць беларусы — 62,3%, палякі — 24,8%, рускія — 10,1%, украінцы — 11,8%, татары і літоўцы — па 0,2%, габрэі — 0,1%. У школах, на базе дамоў і палацаў культуры для іх працуюць кружкі па вывучэнні роднай мовы, якія фінансуюцца дзяржавай.

Марыя Бірукова таксама паведаміла, што фінансавую падтрымку фэсту забяспечваюць Міністэрства культуры Беларусі, Камітэт па справах рэлігій і нацыянальнасцяў, Гарадзенскі аблвыканкам і Гарадзенскі гарвыканкам.

www.naviny.by