Беларуская опера рыхтуецца да гастроляў у Нямеччыне

Трупа Нацыянальнага акадэмічнага Вялікага тэатра оперы рыхтуецца да летніх гастроляў. У ліпені — жніўні артысты адправяцца ў Нямеччыну для ўдзелу ў штогадовым оперным фэсце “Open Air”, які праходзіць улетку па ўсёй краіне. Артысты разлічваюць здзівіць пераборлівую нямецкую публіку трыма кітамі беларускай оперы: спектаклямі “Кармэн”, “Турандот” і сцэнічным дзействам “Карміна Бурана”.

Беларускія спевакі выступяць на самых вядомых пляцоўках Паўднёвай Нямеччыны: у манастыры ў Лоршэ (помнік сусветнай культурнай спадчыны) і манастыры Бенядзікта, дзе, дарэчы, і быў выяўлены рукапіс “Carmina Burana” (зборнік сярэднявечнай лірыкі, на тэксты з якога Карл Орф напісаў сваю сцэнічную кантату). А таксама ў замку ў Карлсруэ і Домскім саборы ў Трырэ.

“Мінск-Навіны”