Літва адзначае...
Прысвячаецца Францішку Багушэвічу

У апошнюю суботу траўня, у Таварыстве Беларускай Культуры (ТБК) у Літве, адбылося чарговае мерапрыемства, прысвечанае чарговай гадавіне з дня нараджэння Францішка Багушэвіча (166).

Ініцыятар імпрэзы — старшыня ТБМ Віленскага краю Юрый Гіль, першапачаткова мерапрыемства павінна было адбыцца на радзіме паэта ў Свіранах, але не атрымалася своечасова замовіць у дэпартаменце аўтобус, і ў апошні момант вырашылі праводзіць у памяшканні ТБК. Вёў імпрэзу старшыня ТБК Хведар Нюнька, ён адзначыў станоўчую працу спадара Гіля ў Свіранах, Савічунах па ўшанаванні памяці Францішка Багушэвіча, сёння рыхтуецца адкрыццё табліцы па вуліцы Коннай у Вільні. Потым меў слова Юрый Гіль. Ён гаварыў пра перашкоды з боку мясцовых уладаў, якія перашкаджаюць мэтанакіраванай працы, асабліва ў Рукойнях, як складана і цяжка знайсці грошы на добрую справу. Але ж хто працуе, той і дасягае вяршынь. Юрый Гіль аформіў два стэнды, адзін прысвечаны Францішку Багушэвічу, другі — святарам-беларусам, якія былі закатаваны бальшавіцкім рэжымам.

Айцец Ян па ўсіх духоўных канонах асвяціў дзве новаствораныя табліцы, якія ў хуткім часе будуць перавезены і ўсталяваны ў Свіранах. Каля партрэта Ф.Багушэвіча гарэлі свечкі, прысутныя маліліся за Францішку Багушэвіча, адзін з выступоўцаў назваў паэта святым.

А Юрый Гіль чытаў свае вершы ў гонар Багушэвіча. Дзейнічала выстава кніг, у тым ліку і даследчыка Уладзіміра Содаля. На імпрэзе прысутнічаў журналіст польскай газеты “Наш час” А.Тышкевіч, радыё “Палёнія” А.Старавойтаў, студэнты ЕГУ і іншыя беларусы Вільні.

У гэты дзень надвор’е не вельмі спрыяла, каб пабываць на радзіме паэта, паблукаць па ваколіцах, падыхаць паветрам, таму прыемна было адзначаць ва ўтульнай зале ТБК, а сабраліся тыя, хто цікавіцца творчасцю, жыццёвым шляхам Францішка Багушэвіча.

Леакадзія Мілаш, г.Вільня
27 траўня 2006 г.