Малітва па-беларуску ад Бенядзікта XVI

Учора ў Варшаву прыляцеў Папа Рымскі Бенедыкт XVI для сустрэчы з каталіцкімі святарамі Польшчы, Украіны, Расіі, Беларусі, кіраўніцтвам Польшчы. Так ён распачаў чатырохдзённую пілігрымку на радзіму свайго папярэдніка Яна Паўла ІІ. Сёння на варшаўскім пляцы Пілсудскага, у час імшы, якую адслужыць папа, будзе прачытаная малітва па-беларуску. Прычым зробіць гэта былы вязень мінскай турмы на вуліцы Акрэсціна.

Учора на Пляцы Пілсудскага ўвесь дзень ішла падрыхтоўка да імшы – плануецца, што ў ёй возьмуць удзел каля двух мільёнаў вернікаў. Рыхтуецца да імшы і беларускі студэнт з Варшавы Зміцер Гурневіч – менавіта ён прачытае з папскага алтара малітву па-беларуску. Яе пачуюць мільёны людзей ва ўсім свеце. Як атрымалася, што менавіта Зміцеру выпаў гонар зрабіць гэта?

Са слоў Зміцера, яму пазваніў біскуп мінска-магілёўскай архідыяцэзіі і запытаў, ці ня мог бы ён гэта зрабіць. “Гэта, я думаю, чыста тэхнічны момант – я жыву ў Варшаве і мне лягчэй гэта зрабіць. Але з другога боку, можа гэта і не выпадкова. Па-першае, я каталік, а па-другое, малітва, якую я буду чытаць, гэта малітва за свабоду і за зняволеныя народы. Магчыма, там ведалі, што я сядзеў 10 дзён на Акрэсціна за ўдзел ў акцыях пасля выбараў у Мінску. Можа гэта таксама мела значэнне”.

Зміцер лічыць вялікім гонарам тое, што малітву па-беларуску ўпершыню ў часе такой вялікай падзеі прачытае менавіта ён: “Я вельмі ўзрушаны. Беларуская мова, гэта адна з усяго трох моваў, на якіх будзе весціся набажэнства (яшчэ па-польску і па-ангельску). Я быў на рэпетыцыі – сэрца моцна б’ецца, я хвалююся, каб добра прачытаць, але з другога боку тое, што беларусы змогуць пачуць малітву па-беларуску, дадае шмат сілаў. Вельмі цешуся. Яшчэ і малітва па зместу блізкая да таго, што адбываецца цяпер у Беларусі. Тое, што беларуская мова будзе адной з трох моваў імшы заўтра – шмат аб чым сведчыць”.

www.svaboda.org