Сустрэчы беларускай апазіцыі ў латвійскім парламенце

24 траўня ў Рыгу для правядзення сустрэч з латвійскімі парламентарыямі прыбыла група беларускіх прадстаўнікоў ад апазіцыі. Падчас візіту беларускія апазіцыянеры маюць намер абмеркаваць з латвійскімі палітыкамі сітуацыю ў Беларусі пасля выбараў 19 сакавіка. Візіт арганізаваны па запрашэнні латвійскіх дэпутатаў.

“Групай парламентарыяў Латвіі па падтрымцы дэмакратычных працэсаў у парламенце і грамадстве Беларусі” сумесна з латвійскай грамадскай арганізацыяй “Адкрытая Беларусь” прадстаўнікі беларускай апазіцыі запрошаныя на двухдзённы візіт.

У склад беларускай дэлегацыі ўваходзяць Ірына Казуліна, кіраўнік сацыялагічнай лабараторыі “Новак” Вардамацкі, старшыня “Праваабарончага альянсу” Гразнова, рэдактар “БДГ. Дзелавой газеты” Марцаў; эканаміст, намеснік старшыні Аб’яднанай грамадзянскай партыі Раманчук і лідэр Партыі камуністаў Калякін.

Ужо 24 траўня прайшлі абмеркаванні некаторых пытанняў далейшага развіцця сітуацыі ў Беларусі.

Падчас абмеркаванняў уплыву Расіі на беларускую сітуацыю з дэпутатамі латвійскага парламента, прадстаўнік АГП, эканаміст Раманчук выказаў меркаванне, што прэзідэнт Расіі Ўладзімір Пуцін “дужаецца не з Лукашэнка, а з яго лабістамі ў Крамлю”, уплыў якіх ён павінен нейтралізаваць у першую чаргу.

У той жа час, Сяргей Калякін лічыць, што “Расійскае кіраўніцтва паставіла задачу не дапусціць або спыніць увесь рээкспарт расійскіх энерганосьбітаў на Захад і перакрыць каналы іншай расійскай прадукцыі, якая ішла праз Беларусь і з’яўлялася сур’ёзнай дапамогай беларускаму бюджэту”.

Па меркаванні прадстаўнікоў беларускай апазіцыі, Беларусь “павінна стаць пытаннем маральнай палітыкі для ЗША і Еўрасаюза, той балючай тэмай, якую варта абмяркоўваць, у тым ліку і з Масквой”.

www.telegraf.by