Беларуская суполка ў Ялце

Наша арганізацыя МГА “ЗБС “Бацькаўшчына” атрымала ліст ад кіраўніка ялцінскай суполкі “Белая Русь” Пятра Якубука, які жывучы за мяжой не забывае пра сваю радзіму, працягвае працаваць на яе гонар і карысць.

“Мы — беларусы!” — піша спадар Пётр Якубук у сваім лісце. — “Як аддзяленне Беларускага нацыянальна-культурнага таварыства ў г. Ялта легалізаваліся 26 верасня 2001 года. Але не юрыдычнай асобай”.

Праз пэўны час гурток беларусаў-“першапраходцаў” прыйшоў да выніку, што трэба легалізаваць гарадскую суполку юрыдычна, афіцыйна. Гэта, вартая вашай увагі падзея адбылася 17 студзеня 2005 года.

“У дзень, калі ў Беларусі, напэўна, валіў з нябёс снег, а ў Ялце — ліў дождж”, — працягвае спадар Якубук, — “на нашу сходку сабраліся не толькі жыхары Ялты, да нас прыехалі кіраўнікі беларусаў Крыму з прадстаўнікамі г. Сімферопаля”.

Па расповеду Пятра Якубука, сход адбыўся цудоўны, не гледзячы на тое, што людзей з-за дажджу было ня шмат. Тады ж была зроблена справаздача па былой дзейнасці, выступаў старшыня суполкі беларусаў Крыму, Рыгор Фёдаравіч Жукоўскі і іншыя. У выніку былі праведзены выбары старшыні ялцінскай суполкі “Белая Русь” (на гэта месца выбралі Пётра Якубука) і Праўлення.

Закрыццём сходкі стала адкрыццё асабовай выставы Пятра Якубука, прысвечанай як сходу, так і 35-годдзю творчай і грамадскай дзейнасці.

Як тады паведамлялі СМІ Ялты і Крыму — свята ўдалося.

Аб кіраўніку суполкі “Белая Русь” можна распавядаць доўга...

Пётр Якубук нарадзіўся і вырас у Беларусі. Яго родныя мясціны: вёска Дзям’янавічы Брэсцкай вобласці, дзе ён нарадзіўся ў 1937 і мястэчка Кобрын, дзе ён выхоўваўся ў дзіцячым доме №2. Яшчэ ў дзяцінстве маці выхавала ў ім пачуццё прыгажосці. А выхавацель у дзіцячым доме казаў, што “Ты Пятрок, абавязкова будзеш мастаком”. Так і было... У 1958 годзе Пётр Якубук паступае ў Мінскую мастацкую вучэльню...

Атрымаўшы ў 1963 годзе па стану здароўя вольны дыплом, ён пераехаў у Ялту. Там Пётр пачаў працаваць як мастак-ювелір. У яго працах пераважала крымская тэматыка, народжаная крымскай прыродай.

Мастак спрабаваў свае сілы ў розных жанрах: ювелірная праца, пастэль і аловак, таксама піша маслам і акварэллю...

Творчая дзейнасць яго пачалася з 1969 года. Тады ён прыйшоў у Ялцінскія вытворча-мастацкія майстэрні. З гэтага ж года пачынаецца і выставачная пара ў яго творчасці. Першы поспех на рэспубліканскай выставе ў 1970 годзе яму прынесла калье і завушніцы з крымскай тэматыкай — “Учан-су”.

У 1990 годзе Пётр Якубук быў прыняты ў Саюз мастакоў Украіны. У гэты час ён быў ужо ўдзельнікам адной міжнароднай, трох усесаюзных, і дзесяці рэспубліканскіх мастацкіх выстаў. А калі ўлічваць яго ўдзел у выставах Мастацкага Фонду Украіны, то колькасць іх будзе лічыцца дзесяткамі.

Шэсць год, з 1993 па 2000 гг. Якубук быў старшынёй Ялцінскай арганізацыі Нацыянальнага Саюза мастакоў Украіны.

Ужо больш 40 год Пётр Якубук жыве і працуе ў Ялце, але ён не забывае пра родную Беларусь. Зараз ён старшыня Ялцінскага аддзялення Беларускага нацыянальна-культурнага таварыства. І калі па святах і Днях горада ў цэнтры Ялты праводзіцца фестываль творчасці народаў Крыма, ён прадстаўляе на іх беларусаў.

Інфармацыйны цэнтр МГА “ЗБС “Бацькаўшчына”
Прэс-сакратар Сацукевіч Дар’я