Рыгор Барадулін прэзентуе сваю кнігу ў Варшаве
24 траўня 2006 ў Варшаве адбылася прэзентацыя кнігі народнага паэта
Беларусі Рыгора Барадуліна “Ксты” – паэт, разам з філолагамі-навукоўцамі
з БДУ прыехаў у польскую сталіцу на запрашэнне Варшаўскага ўніверсітэту.
А 10-й раніцы аўдыторыя кафедры беларускай філалогіі Варшаўскага
ўніверсітэту запоўнілася амаль цалкам – некаторыя студэнты сядзелі
на прыступках. Пётра Дудановіч:
— Я цікаўлюся беларускай літаратурай, а спадар Барадулін для мяне
– увасабленне ўсяго найлепшага і вышэйшага, што ў ёй ёсць. Ягоныя
творы, асабліва з кніжкі “Ксты” і асабліва верш “Пусці ў душу Хрыста”
вельмі шмат для мяне значыць. Я проста ня мог сюды не прыйсці.
На сустрэчу з Рыгорам Барадуліным прыйшоў выбітны перакладчык беларускай
літаратуры на польскую мову Чэслаў Сэнюх, які, сярод іншага, пераклаў
больш за 170 лістоў Барадуліна да Васіля Быкава. Па словах спадара
Сэнюха: “Сярод беларускіх паэтаў, якія жывуць і пішуць цяпер, Барадулін,
на мой погляд, найбольш значны і цікавы. Ён паэт усім сваім жыццём,
ён ня можа не пісаць. Барадулін, гэта паэт-прарок, так як Васіль
Быкаў быў празаікам-прарокам”.
У часе сустрэчы некалькі разоў уздымалася тэма Нобелеўскай узнагароды
для Рыгора Барадуліна. Чэслаў Сэнюх упэўнены, што паэт заслугоўвае
гэтай ўзнагароды: “Барадулін, я абсалютна ўпэўнены, павінен атрымаць
Нобелеўскую прэмію і заслугоўвае яе”.
Пэўным шокам для некаторых прысутных была інфармацыя аб тым, што
творы народнага паэта Беларусі на ягонай радзіме афіцыйна не выдаюць.
Сам Рыгор Барадулін, аднак, не наракаў – ён дзяліўся з прысутнымі
ўспамінамі маладосці, чытаў шмат вершаў: “Упершыню за мяжу я паехаў
з калегамі-студэнтамі якраз у Польшчу ў 1956 годзе. Там у нас быў
прымач, уключылі яго, а там перадача па-руску. Кіраўнік групы кажа
– вось, будзеце слухаць тут Маскву. А там раптам: “Говорит Радио
Свобода – вы слушаете правду о жизни в Советском Союзе”. Тады ён
– выключайце, гэты прымач сапсаваны!”
Пасля сканчэння сустрэчы да па аўтографы Рыгора Барадуліна выцягнулася
даўжэзная чарга студэнтаў.
www.hrodna.by
|