Латвія можа прапанаваць бясплатныя візы ад 1 чэрвеня

Латвія можа стаць першай краінай Еўразвязу, якая будзе выдаваць бясплатныя візы грамадзянам Беларусі. З адпаведнай прапановай выступіў камітэт ураду Латвіі. Ён прапануе зрабіць візы для грамадзянаў Беларусі бясплатнымі ўжо з 1 чэрвеня.

Першы сакратар, кіраўнік консульска-візавага аддзелу амбасады Латвіі ў Беларусі Дзідра Ліепіня тлумачыць, што, згодна з нацыянальным заканадаўствам Латвіі, пытанні, якія разглядае ўрад краіны, папярэдне абмяркоўваюцца на паседжанні ўрадавага камітэту. Гэты камітэт мае выключна дарадчыя функцыі. “Таму казаць пра тое, што візы для беларусаў ужо сталі бясплатнымі, як гэта паспяшылі зрабіць некаторыя медыі, заўчасна”, – цвердзіць спадарыня Ліепіня.

На сённяшні дзень аднаразовая віза ў Латвію для грамадзянаў Беларусі каштуе 35 еўра, шматразовая – 70.

Радыё Свабода