Саюз беларускіх пісьменнікаў “forever”

Вярхоўны суд Беларусі спыніў судовую вытворчасць у справе ліквідацыі Саюзу беларускіх пісьменнікаў. Такое рашэнне прынятае сёння паводле хадайніцтва Міністэрства юстыцыі, якое адклікала адпаведны пазоў. Суддзя Генадзь Мільто абвясціў, што гэтае рашэнне канчатковае і абскарджанню не падлягае.

Пасля таго, як сябры грамадскай арганізацыі здолелі давесці ў судзе неабгрунтаванасць галоўнага абвінавачання, Міністэрства юстыцыі заявіла пра магчымасць адклікання свайго пазову

Галоўным пунктам абвінавачання была нестатутная дзейнасць. Пад такой дзейнасцю мелася на ўвазе правядзенне з’езду Беларускай сацыял-дэмакратычнай партыі (Грамада).

Да апошняга моманту кіраўніцтва Саюзу беларускіх пісьменнікаў не было пэўнае, ці будзе спынены працэс ліквідацыі арганізацыі. Намеснік старшыні СПБ Барыс Пятровіч сказаў: “Усё залежала па вялікім рахунку ад таго, ці на вышэйшым узроўні прымуць рашэнне захаваць Саюз беларускіх пісьменнікаў ці ліквідаваць. Дзякуй Богу, цвярозы розум перамог. Я не магу прагназаваць на будучыню. Але тое, што сёння ў Беларусі існуюць два саюзы, гэта змяняе сітуацыю”.

Паводле спадара Пятровіча, шыльда з гербам “Пагоня” была знятая з уваходу ў будынак Дому літаратара цяперашняй адміністрацыяй, але знаходзіцца на захаванні ў Саюзе беларускіх пісьменнікаў. Нагадаем, што гэта было адной з умоваў адклікання пазовы аб ліквідацыі. Пісьменнікі выправілі таксама і іншыя нязначныя заўвагі з боку міністэрства. Аднак не гэта было галоўнай прычынай, з-за якой Мін’юст вырашыў адмовіцца ад намеру ліквідаваць найстарэйшую творчую арганізацыю. Колішняя старшыня Саюзу, пісьменніца Вольга Іпатава, сказала: “Санкцыі Еўрасаюзу, якія былі ўведзеныя адносна нявыезду чыноўнікаў, яны пачынаюць цяпер спрацоўваць. Ня вельмі прыемна бачыць сваё прозвішча, а таксама ўявіць што ўсе твае родзічы не змогуць паехаць у Еўропу, вось гэты псіхалагічны ціск спрацоўвае. Я так бачу сітуацыю”.

Ня вырашаная пакуль праблема юрыдычнага адрасу. Цяперашняя адміністрацыя Дому літаратара абяцае заключыць дамову арэнды пасля таго, як пісьменнікі вызваляць бібліятэчнае памяшканне. Аднак прыняць у падарунак 300-тысячны кнігазбор бібліятэкі Беларусі адмаўляюцца. Тым часам пісьменнікі спадзяюцца, што пасля спынення працэсу ліквідацыі грамадскай арганізацыі гэтыя пытанні будуць вырашацца хутчэй.

Перамогу Саюзу беларускіх пісьменнікаў паэт Сяргей Законнікаў пракаментаваў гэтак: “Я думаю, што настане такі час, што Саюз пісьменнікаў ізноў будзе ў сваім доме. А ва ўлады ніколі нават ня ўзнікне думкі пра ліквідацыю старэйшай творчай арганізацыі, якая шмат зрабіла для таго, каб нашая краіна была незалежнай. Сённяшнія ўлады гэтага проста не разумеюць”.

Нагадаем, што 2 сакавіка Гаспадарчы суд Мінску задаволіў пазоў Галоўнага гаспадарчага ўпраўлення Адміністрацыі прэзідэнта аб спагнанні з грамадскай арганізацыі Саюз беларускіх пісьменнікаў 55 мільёнаў рублёў платы за арэнду. Раней, у 1997 годзе, Дом літаратара забралі з падпарадкавання Саюзу беларускіх пісьменнікаў, разам з маёмасцю грамадскай арганізацыі. Цяпер будынак Дому літаратара з’яўляецца ўласнасцю прэзідэнцкай адміністрацыі.

Радыё “Свабода”