Вячка Целеш ўзнагароджаны найвышэйшай дзяржаўнай ўзнагародай Латвіі, ордэнам Трох Зорак

Грамадскі і культурны дзеяч Латвіі і Беларусі Вячка Целеш за заслугі перад Латвійскай дзяржавай ўзнагароджаны ордэнам Трох Зорак (найвышэйшай дзяржаўнай ўзнагародай Латвіі).

Як пракаментаваў сваю узнагароду спадар Целеш: “Латвійская дзяржава мяне узнагародзіла вышэйшай узнагародай — ордэнам Трох Зорак. Гэта узнагарода ды прызнанне, я лічу, не толькі мяне, але ўсіх беларусаў як у Латвіі, так і ў Беларусі, якія адстойваюць і падтрымліваюць незалежнасць і дэмакратыю ў Латвіі ды Беларусі”.

Вячка Целеш — мастак, педагог, краязнаўца, філакартыст, грамадскі дзеяч. Нарадзіўся 25 верасня 1938 г. у п. Краснасельскі (в. Краснае Сяло) Ваўкавыскага раёна Гродзенскай вобласці ў Беларусі. 3 1958 г. жыве ў Латвіі.

У 1975 г. скончыў Латвійскую акадэмію мастацтваў. Вучыўся ў Іманта Вэцозола, Петэрыса Постажа, Эдварда Грубэ, Уладзіміра Козіна, Конрада Убана, Эдгара Ілтнера, Эдуарда Калныньша i Петэрыса Ўпіціса.

Працуе ў розных жанрах станкавага жывапісу і графікі, а таксама ў экслібрысе. Сябра Саюза мастакоў Беларусі з 1995 года.

Сваю творчасць мастак прысвяціў Беларусі і Латвіі. Больш за 200 сваіх мастацкіх палотнаў В.Целеш прысвяціў Латвіі і яе людзям. Сваімі працамі мастак прадстаўляў латвійскае мастацтва на міжнародных мастацкіх выставах у Пекіне, Канадзе, Італіі, Чэхіі, Японіі, Чэхіі. Яго імя ўнесена ў каталог “Сусветны экслібрыс” (1994—1998), у міжнародны каталог “Мініяцюрная графіка і экслібрыс” (Пекін), “Сусветную энцыклапедыю мастакоў ўсіх часоў і народаў”.

3 1977 г. удзельнічае ў мастацкіх выставах у Лaтвii, Бeлapyci, Эстоніі, Канадзе, Кітаі, Швецыі, Чэхіі, Iтaлii, Pacei i іншых міжнародных выставах. Экспанаваў свае працы на 23 персанальных выставах у Латвіі, Беларусі, Даніі, Канадзе і ЗША, удзельнічаў у 76 рэспубліканскіх і замежных выставах.

Мастацкія творы Вячкі Целеша знаходзяцца ў Нацыянальным мастацкім музеі Беларусі , у музеі Янкі Купалы ў Мінску, у музеі ў Гродна і іншых дзяржаўных і прыватных зборах Латвіі, Беларусі, Эстоніі, Канады, ЗША, Італіі, Румыніі, Чэхіі, Кітая, Францыі, Ізраіля, Расіі і Даніі.
У 1990 годзе В.Целеш стаў заснавальнікам Міжнароднага аб’яднання мастакоў-беларусаў Балтыі “Маю гонар”. Выставы аб’ яднання ладзіліся ў Латвіі, Беларусі, Эстоніі, Літве, Чэхіі.

Аўтар тэкстаў і складальнік кніг “Мінск на старых паштоўках” (1984), “Рыга на старых паштоўках” (1991), “Гарады Беларусі на старых паштоўках” (1984) – гэтая кніга перавыдавалася двойчы, 2-е выданне 2001 года.

За кнігу “Гарады Беларусі на старых паштоўках” Беларускі ПЭН-цэнтр у 2000-м годзе ўзнагароджвае яе аўтара Вячаслава Міхайлавіча Целеша Ганаровай прэміяй імя Францішка Багушэвіча.

Вялікі ўнёсак як арганізатар В.Целеш зрабіў у справу адраджэння беларускай асветы ў Латвіі. Ён узнагароджаны памятным знакам Асацыяцыі нацыянальна-культурных таварыстваў Латвіі імя Іты Казакевіч. У 1997 годзе за заслугі перад Латвіяй Сайм Латвійскай Рэспублікі прысвоіў Вячаславу Целешу латвійскае грамадзянства.

МГА “ЗБС “Бацькаўшчына” сардэчна віншуе свайго сябру і паплечніка. Жадаем далейшай плённай дзейнасці на карысць Латвіі і Беларусі. Спадзяемся, што неўзабаве наступяць часы, калі і Беларусь будзе годна адзначаць дасягненні сваіх суайчыннікаў.

Інфармацыйны цэнтр МГА “ЗБС “Бацькаўшчына”