Івонка Сурвілла сустрэлася з беларусамі Аўстраліі

Старшыня Рады Беларускай Народнай Рэспублікі Івонка Сурвілла правяла шэраг сустрэч з беларусамі Аўстраліі, на якіх былі абмеркаваныя магчымасці дыяспары ў спрыянні дэмакратызацыі Беларусі. Разам з Івонкай Сурвіллай Сідней і Мельбурн наведаў карэспандэнт "Свабоды" Сяргей Навумчык.

У Сіднеі Івонку Сурвіллу прывітаў старшыня Беларускага грамадска-культурнага клуба Міхась Лужынскі. У будынку клуба адбылася сустрэча з беларусамі Сіднея, падчас якой абмяркоўвалася сітуацыя ў Беларусі, спосабы, якімі аўстралійская дыяспара можа дапамагчы дэмакратызацыі Бацькаўшчыны.

Аўстралійскія беларусы вялі актыўную выдавецкую дзейнасць, выпускалі часопісы “На варце”, “Лучнік”, бюлетэнь “Новае жыццё”, які цяпер адноўлены намаганнямі прадстаўніка новай хвалі эміграцыі Віктара Кавалеўскага.

Пасля Сыднэя Сурвілла накіравалася ў Мельбурн, які на працягу доўгага часу лічыўся цэнтрам беларускага жыцця Аўстраліі. Старшыня Рады БНР наведала набажэнства ў царкве Трох віленскіх пакутнікаў Беларускай аўтакефаліі. Кіраўнік Федэральнай Рады беларускіх арганізацыяў Аўстраліі Яўген Груша наладзіў прыём з удзелам кіраўнікоў беларускіх арганізацыяў штату Вікторыя. У Мельбурне ўдзельнікі вакальнай групы “Каліна” прадставілі свае песні, выдадзеныя на кампакт-дысках.

У аўторак старшыня Рады БНР Івонка Сурвілла прыбыла ў Адэлаіду, дзе ў царкве Святых апосталаў Пятра і Паўла адбылося набажэнства, а потым сустрэча з прадстаўнікамі мясцовай беларускай дыяспары.

Паводле Радыё “Свабода”