Нон-грата для ЗША

Джордж Буш: “Забарона павінна дапамагчы народу Беларусі дабіцца рэалізацыі мары аб дэмакратыі”

Спіс асобаў, якія падпадаюць пад забарону на ўезд у Злучаныя Штаты, не абмяжоўваецца беларускімі службоўцамі. У ЗША не змогуць заехаць іх жонкі, а таксама прадпрымальнікі, якія атрымлівалі прыбытак ад “парушэння дэмакратыі і правоў чалавека ў Беларусі”. Пэўны спіс персон нон-грата прэзідэнт даручыў скласці главе Дзярждэпартамента Кандалізе Райс.

“Я вырашыў, што ў інтарэсах ЗША будзе прыманне ўсіх магчымых мер для абмежавання міжнародных паездак і забароны на ўезд у ЗША прадстаўнікоў урада Аляксандра Лукашэнкі”, — гаворыцца ў распараджэнні прэзідэнта, якое было падпісана 12 траўня.

Джорж Буш паказаў, што забарона закране таксама “прадстаўнікоў урада Лукашэнкі і тых, хто ўдзельнічаў у фальсіфікацыі выбараў, парушэннях правоў чалавека або карупцыі, падрывае або наносіць шкоду дэмакратычным інстытутам і перашкаджае перамозе дэмакратыі ў Беларусі”, паведамляе агенцтва “Reuters”.

У нядзелю газета “Financial Times Deutschland” паведаміла, што ЕС рыхтуецца прыняць рашэнне аб арышце рахункаў прэзідэнта Беларусі і шэрагу беларускіх службоўцаў. Яно з’яўляецца працягам папярэдняга рашэння міністраў краін Еўрасаюза аб забароне на ўезд на тэрыторыю ЕС.

Дыпламаты некаторых еўрапейскіх краін паведамілі, што 25 урадаў краін-чальцоў ЕС дамовіліся аб тым, што арышт будзе накладзены на рахункі ўсіх афіцыйных асобаў, закранутых апошняй забаронай на ўезд, а таксама на рахункі службоўцаў, закранутых папярэдняй забаронай.

Пад дзеянне санкцый трапляюць прэзідэнт, службоўцы з апублікаванага раней спісу, і іх сем’і.

www.telegraf.by