Бясплатныя візы ў ЕС

У ЕС рыхтуюцца новыя ініцыятывы адносна Беларусі. Еўрапейцы маюць намер актыўней развіваць кантакты з насельніцтвам краіны, а таксама ўзмацніць жорсткасць санкцыяў супраць кіраўніцтва краіны, піша “Незалежная газета”.

У інтэрв’ю дэпутат Еўрапарламента, чалец парламенцкай працоўнай групы па Беларусі Шанін Хэнніс Плашэр, распавяла, што ў першую чаргу праца Еўропы будзе скіравана на дапамогу моладзі. “Спадзяюся, што наш праект, які прадугледжвае прадстаўленне беларускім студэнтам магчымасці вучыцца ва ўніверсітэтах краін – чальцоў ЕС, будзе рэалізаваны ў кароткія тэрміны на ўзроўні кожнай дзяржавы Адзінай Еўропы”, — заявіла Плашэр, дадаўшы, што яна ўжо напісала ліст міністру замежных спраў Нідэрландаў з запрашэннем, каб ён прадставіў прапанову на разгляд кіраўнікоў МЗС усіх 25 краін, чальцоў ЕС.

Другая ініцыятыва датычыцца віз. “Мы будзем імкнуцца да таго, каб пераканаць нацыянальныя ўрады прыняць рашэнне аб прадстаўленні бясплатных віз беларускім грамадзянам”, — гаворыць Плашэр. Гэта значыць кошт візы будзе нуль еўра з тым, каб у беларусаў была магчымасць мець зносіны з суседзямі не толькі з Усходу, але і з Захаду.

Адначасова еўрапейцы маюць намер пашырыць санкцыі супраць групы з трыццаці высокапастаўленых беларускіх службоўцаў на чале з Лукашэнкам. У прыватнасці, па меркаванні дэпутата, уведзеная яшчэ ў красавіку гадавая забарона на ўезд шэрагу службоўцаў, павінна быць дапоўнена закрыццём асабістых рахункаў гэтых асоб і членам іх сем’яў.

Паводле www.charter97.org