ААН без Беларусі

9 траўня падчас пасяджэнняў Генеральнай асамблеі ААН абрана 47 чальцоў рады па правах чалавека. Беларусь не ўвайшла ў новую Раду ААН.

У сакавіку 2006 года было прынятае рашэнне аб замене Камісіі па правах чалавека радай. Камісію доўгі час крытыкавалі за тое, што ў яе склад уваходзяць прадстаўнікі краін, дзе парушаюцца правы чалавека, у прыватнасці Беларусь, Кітай, Зімбабвэ і Судан.

У раду ААН увайшло 47 чальцоў замест 53. Яны былі абраныя агульным галасаваннем на трохгадовы тэрмін. Калі камісія была органам Эканамічнай і сацыяльнай рады ААН, то рада стане дапаможным органам Генасамблеі.

На 47 месцаў прэтэндавала 65 дзяржаў. З краін былога Савецкага Саюза ў раду ўвайшлі Азербайджан, Расія і Ўкраіна. Арменіі і Грузіі не атрымалася набраць неабходную колькасць галасоў.

Беларусь і ЗША не выносілі свае кандыдатуры на галасаванне. Варта адзначыць, што яны ўваходзілі ў лік краін — чальцоў камісіі.

У новым органе ААН прадстаўленыя ўсе рэгіёны свету. Як паведамляе інфармацыйнае агенцтва РЫА “Навіны”, Азію прадстаўляюць Індыя, Інданезія, Кітай, Пакістан, Саўдаўская Аравія і Японія, Афрыку — Алжыр, Нігерыя і Паўднёва-Афрыканская Рэспубліка, Лацінскую Амерыку — Бразілія, Аргентына, Мексіка і Куба, Заходнюю Еўропу — Нямеччына, Францыя, Вялікабрытанія, Швейцарыя і Фінляндыя і, нарэшце, Усходнюю Еўропу — Польшча, Чэхія, Румынія і Вугоршчына.

У групе заходніх краін Нямеччына набрала найбольшы лік галасоў — 157 з 191 галасы (гэтая колькасць дэлегацый дзяржаў — чальцоў Генеральнай асамблеі ААН). На другім месцы апынулася Францыя.

19 чэрвеня ў Жэневе адбудзецца першае паседжанне Рады ААН па правах чалавека.

naviny.by